Godigo Nogi Ugwaba Sabo Tęąbi Po Wabo Buku Dabe 51:2-14

²Nago ena tigidali ąį telayao, tama dwai kolesaga enade ma elaludalio. Eno sęgę sela sąnama, ena dwagi yai pedelama bidaio.

³Eno koneai, eno dwai sę yai. Tama ena yali sęgęde eno homugo konealubo tagalobeo.

⁴Eno dwai sęgę nage deli dali naga yai. Eno dwai kolesaga nago gedude yai. Tama nago ena po tų ela menama, tama nago doloba pai kolesaga naga yao. Nago eno sęgę wei siyu, tama nage da, dwai sę isiąwai bidi.

⁵Nago koneai, idago ena ame nani sogo, ena dwai sę ebo bidi pedelai. Mu tama, ena idago haligade bidibadi, ena sęgę sai bidi dao.

⁶Nago homugo te eno nage dolo naga wali asiyu, tibo kolesaga igio homu ebao. Tama tibaso, nago ena dwagi yai homu kolesaga ola mao.

⁷Nago eno sęgę sela sąnama, ena meda meni yai pedelaio. Nago ena ąį tedelama, ena meda isiąwai mu pedelaio, tedela yai kedau ebo nai sno te tiwai pedelaibao.

⁸Nago eno homu dwagi yai ma ilao. Mu tamao, nago ena aiyaba elaluai, tama nago eno sęgę wei ponai, tialima, megi eno dwagi yai homu ma yaibao.

⁹Nago eno dwai sę yaliba ma tonono igio. Tama eno homugo nago eno dwai sę yali te nago tigidali sela sąyao.

¹⁰God, nago eno homu kolesaga tomode meda meni yai dwagi yai gesi kolesaga ilibo sę ma yao. Awe, ena nage dali homugo kęą pai bidi pedalumainu yao.

¹¹Nago ena sela sąyu, tama ena nage digibulu bididalio. Nago ena dali bidibo mobo bidi naga ma sidalio weyu.

¹²Polobadu nago ena ma sobaso, te ena dwagi yai homu yai, nage dali. Tama megi eno te homu yai, nago ena te dwagi yai homu kolesaga enabolo ma mao. Nago eno homu kolesaga hodolama, tama nago po eno wali paibao. Eno tama homu kolesaga emainogo nago ena dąų walagameo.

¹³Tama eno nago kolesaga te sęgę sai we bidi augwalibolo ola mawaibao, tama te we bidi augwali nage bidibo digi ma asaibao.

¹⁴God, nage te God nago ena ma sabo bidi dao, nago ena dali olo mabo sę tigidali dwagi yai eyu, tama nago ena ma elegio. Tama eno nago nogi ugwaba siyu, nagebolo tęąbi hauwa waibao, nago doloba pai kolesaga naga ebo dao.