Pisalem 51:2-14

²Gaugau ina gi daha mo au ogu huaidu huogodoo, haga madammaa ina gi daha ogu huaidu!

³Au e iloo ogu huaidu, ogu huaidu e modongoohia eau i nia madagoaa huogodoo.

⁴Au guu hai dagu ihala, gu hai baahi adu gi di Goe, ma go Kooe hua dela ne hai baahi ginai au. Au guu hai di mee huaidu dela guu hai Kooe bolo di huaidu. Malaa, Goe e donu hua ma ga hagi aga au, gei e donu hua ma ga haga donu mai au bolo au e hala.

⁵Au tangada hua huaidu mai i dogu laangi ne haanau ai. Au ne haanau mai, gei au tangada hua huaidu.

⁶Goe e hiihai gi di manawa madammaa ge e donu. Haga honu ina ogu hagamaanadu gi do kabemee.

⁷Daawa ina gi daha ogu huaidu, gei au ga madammaa. Gaugau ina au, gei au koia ga madammaa giagia i nia ‘snow’.

⁸Heia au gi hagalongo gi nia lee tenetene mo manawa lamalia. Ma e aha maa Goe gu haga mooho ogu dudaginga mo ogu iwi, gei au ga manawa lamalia laa.

⁹Huli gi daha mo ogu huaidu, weedee ogu huaidu huogodoo.

¹⁰Meenei God, heia mai gi ogu lodo di manawa madammaa, gaamai gi ogu lodo di hagataalunga hoou ge manawa dahi.

¹¹Hudee hudu ina au gi daha mo Goe. Hudee daawa ina dau Hagataalunga Dabu la gi daha mo au.

¹²Gaamai labelaa di tenetene dela e hanimoi i do hagamouli. Heia au gi hiihai e hagalongo adu gi di Goe.

¹³Gei au ga aago au haganoho gi digau huaidu, gei digaula ga maaliu mai gi di Goe.

¹⁴Meenei God dogu Hagamouli, Haga dagaloaha ina dogu mouli, gei au ga manawa lamalia ga hagadele oo donu.