SALMOS 24:2-10

²Pampa yaya quitatzquilti cuali huan quiquetzqui ni taltipacti tatzinta ipan nopa at cati tahuel huejcata.

³¿Ajquiya huelis tejcos ipan itepe TOTECO? ¿Ajquiya huelis itztos ipan itiopa cati tatzejtzeloltic?

⁴Huelis itztose nepa san cati quipiyaj inimax huan iniyolo tapajpacti iixpa, pampa yaya quintapojpolhuijtoc inintajtacolhua. San yase nepa cati amo quihueyichihuaj se taixcopincayot huan cati amo istacatij quema quitestigojquetzaj TOTECO.

⁵Quena, quinmaquixtis TOTECO, huan quintiochihuas huan quiijtos para inijuanti itztoque cuali iixpa.

⁶Cati quej nopa quitemohuaj Toteco Dios, huelise moquetzase iixpa huan quihueyichihuase Toteco Dios cati Jacob huejcajquiya quitoquili.

⁷Ma motapoca cuali nopa huejhueyi caltemit cati ipa eltoya huan nochipa eltos ipan altepet Sion, pampa calaquiqui nopa hueyi tanahuatijquet cati quinahuatía nochi taltipacti huan ilhuicacti.

⁸¿Ta tijmati ajquiya nopa hueyi tanahuatijquet cati quinahuatía nochi ilhuicacti huan taltipacti? Yaya TOTECO cati quipiya fuerza huan hueyi ichicahualis. Yaya TOTECO cati tatantinemi ipan nochi tatehuilisti.

⁹Ma motapoca cuali nopa caltemit cati ipa eltoya huan para nochipa eltos ipan altepet Sion, huan calaquis nopa hueyi tanahuatijquet cati quinahuatía nochi taltipacti huan ilhuicacti.

¹⁰¿Ta tijmati ajquiya nopa hueyi tanahuatijquet cati quinahuatía nochi taltipacti huan ilhuicacti? Yaya TOTECO. Yaya nopa hueyi tanahuatijquet cati quinahuatía nochi taltipacti huan ilhuicacti.