Mboe 24:2-10

²Pa ni ta iur toono ma imbot se yok ŋwaana. Mi iparaama toono mbule tuunu ma tuŋ sula kat ta tai leleene a.

³Asiŋ ta irao be isala pa abal ki Yooba mi isuŋ pini? Mi tomtom pareiŋana ta irao be ilela urum kini potomŋana mi imender su kereene uunu? Ina tomtom ta kembei:

⁴Ni ikam ŋoobo mbulu sa som. Mi leleene ma ŋgar kini na, iŋgeeze men. Mi imbesmbeeze pa koroŋ pakaamŋan som, mi ipombolmbol sua pakaamŋana som. Tomtom ta kembei, ni ko irao be ilela.

⁵Mi Yooba ko ikampe i. Anutu ta ulaaŋa kini na, ko ikamke i ma imbot ambai, mi ipaati be tomtom ndeeŋeŋana.

⁶Tana zin wal ta kembena, ta tikam kinkiini be tiute Merere mi timbot kolouŋana pini. Anutu ki Yakop, ina zin wal ta kembena ta timama kerem uunu.

⁷O niom kataama ta boozomen, niyom ise mi kakaaga ma biibi. Niom kataama aliŋgumoraŋoyom na, kakaaga ma itaanda kat. Naso king zaanaŋana zalaana be imar ma iloondo piom.

⁸Lak, king zaanaŋana, ni asiŋ? Ni Yooba tau! Ni mbura keskeezeŋana mi mbolkeŋkeŋŋana. Mi ni irao kat pa malmal. Pa namaana alalalŋana tau.

⁹O niom kataama ta boozomen, niyom ise mi kakaaga ma biibi. Niom kataama aliŋgumoraŋoyom na, kakaaga ma itaanda kat. Naso king zaanaŋana zalaana be imar ma iloondo piom.

¹⁰Lak, king zaanaŋana, ni asiŋ? Ni Yooba tau. Ni mbura keskeezeŋana mi king zaanaŋana!