SALMOS 22:24-31

²⁴Pampa amo techelcajtoc quema titlaijiyohuíaj, niyon amo techhuejcamajcajtoc. Amo neli techcuanetlatilía. ¡Amo! Ta techtlacaquilía quema timitztlajtlaníaj techpalehuiqui.

²⁵Huajca, TOTECO, ipan nopa hueyi tlasentililistli nimitzpaquilismacas iniixtla nochi momasehualhua, pampa ta titemachtli. Iniixpa catli mitztlepanitaj huan quiimacasij mitzixpanose, na nijchihuas catli nimitztencahuilijtoc para nijchihuas.

²⁶Huajca nochi catli teicneltzitzi tlacuase huan ixhuise. Nochi catli quitemohuaj TOTECO quipantise huan quipaquilismacase. Quena, paquise para nochipa.

²⁷Masehualme ipan nochi tlalme campa hueli ipan tlaltipactli motepotztocase huan quielnamiquise TOTECO. Inijuanti pehuase quihueyimatise huan motlancuaquetzase iixpa.

²⁸Pampa TOTECO, yaya nopa tlanahuatijquetl catli quinahuatía nochi tlalme.

²⁹Nochi catli quipiyaj tomi huan nochi catli teicneltzitzi ipan ni tlaltipactli motlancuaquetzase iixpa. Quena, nochi tlaltipac ehuani catli teipa miquise, quihueyimatise.

³⁰Nojquiya noteipan ixhuihua quihueyimatise TOTECO huan tepohuilise tlen ya nochi ininnemilis.

³¹Quema toteipan ixhuihua tlacajtiyase, tepohuilise para xitlahuac TOTECO huan nochi nopa huejhueyi tlamantli catli techchihuilijtoc.