SALMOS 119:70-137

⁷⁰Inijuanti huihuitique huan tzactoc inintlalnamiquilis, pero na nochipa nimopaquilismaca ipan moley.

⁷¹Nelía cuali para techechcapantlali, pampa technextili para ma nijchihua nochi catli techyolmelajtoc ma tijchihuaca ipan tonemilis.

⁷²Para na más ipati moleyes huan amo millones tlen oro huan plata.

⁷³TOTECO, ta ica momax tijsencajqui notlacayo. Huajca ama techpalehui ma niquinmachili motlanahuatilhua huan niquintzontecomatis.

⁷⁴Nochi catli mitztlepanitaj huan motemachíaj ipan ta, paquise quema nechitase, pampa na nimotemachía ipan mocamanal.

⁷⁵TOTECO, na nijmati para motlamachtil senquistoc xitlahuac. Huan nopa tlatzacuiltili catli techmacatoc nojquiya xitlahuac, huan nechhualiquilis tlamantli catli cuali.

⁷⁶Huajca ama techyoltlali ica moteicnelijcayo, senquistoc quen techilhuijtoc na, nimotequipanojca, para tijchihuas.

⁷⁷Techyahualo ica motlaicnelijcayo para ma niyolto, pampa san ipan moley nijpantía paquilistli.

⁷⁸Ma huetzica ipan pinahualistli nopa masehualme catli mohueyimatij, pampa tlahuel nechcocojtoque ica iniistlacaticayo. Pero na san nimonejnehuilijtinemis catli quiijtohuaj motlanahuatilhua.

⁷⁹Ma sempa mosentilica nohuaya nopa masehualme catli mitzimacasij huan mitztlepanitaj, huan catli quiiximatij motlajtol.

⁸⁰Xijchihua para noyolo ma monejnemilti xitlahuac ipan nochi catli techyolmelajtoc. Huan quej nopa amo quema nimopinahualtis.

⁸¹Na nitlapolosnequi pampa nijchiya para techmaquixtis tlen nocualancaitacahua, pampa nimotemachijtoc ipan catli tiquijtojtoc para techchihuilis.

⁸²Noixteyolhua siyahuij pampa quinequij quiitase ma pano nochi catli techtlajtolcahuilijtoc para tijchihuas. ¿Hasta quema techyoltlalis ica motlapalehuil?

⁸³Ya nihuehuentzi huan nitzocoyolijtoc quen se cuetlax bolsa catli quitlalijtoque campa poctli, pero amo niquelcajtoc catli techyolmelajtoc.

⁸⁴¿Quesqui tonali monequi nijchiyas para tiquintlatzacuiltis catli nechtoquilijtinemij?

⁸⁵Nopa masehualme catli mohueyimatij huan catli quicualancaitaj moleyes quichijtoque se hueyi ostotl para ma nimasi.

⁸⁶Techpalehui, pampa motlanahuatilhua senquistoc xitlahuac, huan nechtepotztocatinemij masque amo tleno nijchijtoc.

⁸⁷San quentzi nechixpolihuiltíaj, pero na amo niquinixpanotoc motlanahuatilhua niyon amo niquincajtoc.

⁸⁸Pampa hueyi moyolo, techcahuili ma niitzto. Huan quej nopa nijsenhuiquilis nijchihuas catli quiijtohua motlajtol.

⁸⁹TOTECO, mocamanal eltos temachtli para nochipa nepa ilhuicac.

⁹⁰Mojmostla ta titemachtli huan tiitztos temachtli ica nochi catli tlacajtiyase para nochipa. Cuali ta tijtlatzquilti ni tlali huan quej nopa eltoc.

⁹¹Nochi tlamantli mocahua campa tiquinnahuati ma eltoca hasta ama ni tonal. Quena, nochi tlamantli catli tijchijqui mitzneltocaj huan mitztequipanohuaj.

⁹²Sintla amo nimopaquilismacatosquía ipan moley, huajca ya nimictosquía ica tequipacholi.

⁹³Amo quema niquinelcahuas motlanahuatilhua, pampa ica motlanahuatilhua techmacatoc yancuic chicahualistli.

⁹⁴Na nimoaxca, techmaquixti pampa nochipa nijchijtinentoc catli quiijtohuaj motlanahuatilhua.

⁹⁵Masque nopa tlaixpanoca tlacame motlatise ipan ojtli para nechtzontlamiltise, na san nimonejnehuilijtos tlen motlajtol.

⁹⁶Nochi tlamantli catli más cuajcualtzi niquitztoc canque ontlami, pero motlanahuatilhua, amo quipiyaj inintlamiya.

⁹⁷¡Tlahuel niquicnelía moley! San tlen ya nimonejnehuilijtinemi semilhuitl.

⁹⁸Motlanahuatilhua nechchijtoque más nitlalnamiqui que nocualancaitacahua. Pampa motlanahuatilhua nechyacantiyohuij mojmostla.

⁹⁹Quena, achi más nitlalnamiqui hasta niquintlani inijuanti catli notlamachtijcahua, pampa na nimonejnehuilijtinemi tlen motlajtol.

¹⁰⁰Na más nijmachilía que nopa huehue tlacame, pampa nijchihua catli quiijtohuaj motlanahuatilhua.

¹⁰¹Amo quema nijnectoc nijtoquilis se ojtli catli amo cuali, pampa senquistoc nijnequi nijchihuas catli quiijtohua mocamanal.

¹⁰²Amo nimohuejcatlalijtoc tlen motlamachtil, pampa ta technextilía quenicatza ma nimonejnemilti.

¹⁰³Nijmati nelía ajhuiyac mocamanal. Achi más tzopelic nijmati que sayolnectli.

¹⁰⁴Motlanahuatilhua nechmacaj tlalnamiquilistli. Yeca amo nijnequi niquitas niyon se tlamantli istlacatili.

¹⁰⁵Mocamanal eltoc quen se tlahuili catli quitlahuilía noojhui campa ninejnemi para amo nimotepotlamis.

¹⁰⁶Se huelta nitlatestigojquetzqui, huan ama sempa nitlatestigojquetzas para nijchihuas catli quiijtohuaj motlamachtilhua pampa nelía xitlahuac.

¹⁰⁷TOTECO, nechcatitoc para nimiquis ininmaco nocualancaitacahua. Techmaca yancuic chicahualistli quen tiquijtojtoc para tijchihuas.

¹⁰⁸TOTECO, nimitztlajtlanía xijseli nopa tlascamatili catli nimitzmaca quen se tlacajcahualistli. Huan technextili motlamachtil.

¹⁰⁹Mojmostla nimopantía campa mahuilili para nonemilis, pero amo niquelcajtoc moley.

¹¹⁰Nopa tlaixpanoca masehualme quitlalíaj tlaquetztli para ma nimasi huan nihuetzis ipan tlajtlacoli, pero na amo nimoiyocanequis tlen motlanahuatil.

¹¹¹Na san nimoaxcatijtoc motlajtol, pampa san ipan motlajtol nijpantía paquilistli.

¹¹²Ica nochi noyolo nijchihuas catli quiijtohuaj motlanahuatilhua nochipa hasta nimiquis.

¹¹³Amo nijnequi niquinitas masehualme catli quichihuaj ome iniixayac. Pero na niquicnelía moley.

¹¹⁴Ipan ta nimotlatía para amo nechcocose nocualancaitacahua huan ipan ta nimomanahuía. Pampa nimotemachía san ipan mocamanal.

¹¹⁵Ma nechtlalcahuica nopa masehualme catli fiero inintlalnamiquilis. Ma amo nechcuatotonica pampa na nijnequi nijchihuas catli quiijtohuaj motlanahuatilhua, Toteco Dios.

¹¹⁶Huajca noTeco, techmaca yancuic fuerza senquistoc quen techtlajtolcahuili. Huan quej nopa sequinoc amo quema huelis quiijtose para san tlapic nijpixqui nechiyalistli ipan ta.

¹¹⁷Techfuerzajmaca para nimomaquixtis ininmaco nocualancaitacahua, huan nochipa nijpiyas paquilistli para nijchihuas catli techyolmelajtoc.

¹¹⁸Ta tiquinhuejcamajcajtoc nochi catli quitlahuelcahuaj catli techyolmelajtoc. Inijuanti quiijtohuaj tlalnamiquij, pero amo neli, san mocajcayahuaj.

¹¹⁹Nochi masehualme catli quinpactía tlajtlacolchihuaj ipan ni tlaltipactli tiquinita quen itetejtzo tepostli catli mocahua quema tijmolonía para tijtlapajpacchihuas. Pero na niquicnelía huan nijtlepanita motlajtol.

¹²⁰Nochi notlacayo huihuipica pampa mitzimacasi huan mitztlepanita, Toteco. Huan nojquiya niquimacasi motlatzacuiltil, huan yeca amo nijnequi nimitzixpanos.

¹²¹Na nijchijtoc catli xitlahuac huan catli melahuac moixpa. Amo techtlahuelcahua ininmaco nocualancaitacahua,

¹²²Xitlatestigojquetza para techtiochihuas na, nimotequipanojca. Amo xiquincahuili ma nechtlaijiyohuiltica nopa masehualme catli mohueyimatij.

¹²³Campa hueli nitlachixtoc pampa nijchixtoc techmaquixtiqui tlen nocualancaitacahua, hasta siyajtoque noixteyolhua. Nijchixtoc techmanahui senquistoc quen tiquijtojtoc para tijchihuas.

¹²⁴TOTECO, ipan motlaicnelijcayo techchihuili catli cuali na, nimotequipanojca. Technextili quenicatza nijchihuas catli techyolmelajtoc ma tijchihuaca.

¹²⁵Na nimotequipanojca, techmaca tlalnamiquilistli, para niquiximatis motlajtol.

¹²⁶TOTECO, ya ajsic hora para timonextis huan tijchihuas catli tiquita para cuali. Pampa ni tlaixpanoca masehualme ayacmo quitlepanitaj moley.

¹²⁷Pero na más niquinicnelía motlanahuatilhua huan amo quen oro catli senquistoc cuali.

¹²⁸Pampa nochi motlanahuatilhua nelía xitlahuac. Yeca amo nijnequi niquitas niyon se tlamantli istlacatili.

¹²⁹Motlajtol nelía yejyectzi, TOTECO, yeca nijtoquilijtinemi ica nochi noalma.

¹³⁰Quema quiixtomaj mocamanal, techtlahuilía huan techtlalnamictía nochi timasehualme, hasta nojquiya masehualme catli san quentzi quimachilíaj.

¹³¹Yeca tlahuel nijnequi niquiximatis más catli quiijtohuaj motlanahuatilhua, huan ya nopa nijtemohua.

¹³²Techtlachili huan techtlasojtla, quen timomajtoc tiquinchihuilía catli mitzicnelíaj.

¹³³Techyacana ipan se cuali ojtli ica mocamanal para amo nechtlanis niyon se tlaixpanoli.

¹³⁴Techmanahui tlen nopa tlacame catli mosisiníaj huan quinequij nechtlaijiyohuiltise. Huan quej nopa nijchihuas catli quiijtohuaj motlanahuatilhua.

¹³⁵Ma monexti moteicnelijcayo ipan moixayac quema techtlachilía na, nimotequipanojca, huan techmachti nochi catli techyolmelajtoc para ma tijchihuaca.

¹³⁶Tlahuel nichoca pampa miyac masehualme amo quitlepanitaj moley.

¹³⁷TOTECO, ta nelía tixitlahuac huan nochi tlatzacuiltili catli titemaca nojquiya xitlahuac.