1Tzin xajanej Jehová, yujto ix yab' in lesal ayic ix in tevi d'ay.
2Yujto ix yab' tas ix in c'an d'ay, yuj chi' ol val in b'a d'ay yacb'an pitzan into.
3Ijan val ix in yamchaj yuj chamel. Ix ja syaelal chamel d'ayin. A ilc'olal yed' yaelal ix javi d'a vib'an̈.
4Ichato chi' ix valan in b'a d'a Jehová. Ix in tevi d'ay yic syac'an b'oxoc in c'ool.
5A Jehová, tojol toni, tz'oc' sc'ol d'ayon̈. A co Diosal, yelxo val te nivan svach'c'olal.
6A stan̈van eb' emnaquil yeq'ui. Ayic toxo ix el vip, a ix in colani.
7Ayxo in junc'olal ticnaic svab'i, yujto a Jehová vach' ix yutej sc'ol d'ayin.
8Maj in scha chamlaj, ix in scol d'a in cusc'olal, maj in schalaj telvoc.
9Yacb'an pitzan into ol in c'anab'ajej.
10Ix vac'och Jehová yipoc in c'ool, d'a scal in nivan yaelal ix valani: Te ya ayin, xin chi.
11Man̈xo animaoc vaj svab'i, yuj chi' ix vala' to masanil eb' anima, max yal-laj cac'anoch tas syal eb' yipoc co c'ool.
12¿Tas ol vutej vac'an spac masanil svach'c'olal Jehová ix yac' d'ayin?
13Ol vic'cot vino ofrendail d'ay yuj vac'an yuj diosal d'ay, yujto ix in scolo'.
14A d'a yichan̈ masanil schon̈ab' ol vaq'uelc'och tas ix val d'ay.
15Te nivan yelc'och d'a yichan̈ Jehová ayic scham junoc mach yicxo.
16Mamin Jehová, a in ton tic, a checab' in. A ach ix in a coleli, yuj chi' libre in ticnaic.
17Ol vac' in silab' yuj ac'oj yuj diosal d'ayach yuj spacoc a vach'c'olal. Ol val in b'a d'ayach.
18Mamin Jehová, ol vaq'uelc'och in ti' d'ayach d'a yichan̈ masanil eb' a chon̈ab',
19d'a yamaq'uil a templo d'a snan̈al chon̈ab' Jerusalén. Scal vach' lolonel d'ayach Jehová.
