Salmo 148:2-14

²Dayawen yos sisya, dakayo ay aanghel na ya amin ay wadad daya ay mansilsilbi en sisya.

³Dayawen yos sisya, dakayo ay agew ya bowan, ya mankimkimmi ay talaw ed kayang.

⁴Dayawen yos sisya, sik-a ay mismo ay daya ya dakayo ay danom ay nasisinop sin ngato na.

⁵Dayawen da koma si Yahweh ay namarsua, tan inbilina et nawada da.

⁶Inkeddeng na di pantean da si eng-enggana et masapol ay tongpalen da.

⁷Dayawen yo abe si Diyos, dakayo ay wadas nan daga, amin ay danom sin baybay enggana sin lanad na, ya dakayo ay manbeey sidi ay kaeegyat di ila na,

⁸dakayo abe ay kimat, dalalo, andap ya liboo, mapges ay dagem ay manongpal sin bilin di Apo.

⁹Dakayo ay dontog ay nangato ya nababa, olay dakayo ay kakaiw ya molmola, dayawen yo amin si Diyos ay namarsua.

¹⁰Dakayo abe ay animal, omali kayo, mankodkodap ya mantaytayaw, naatap ya naamo, ta dayawen yo ay kosto si Diyos ay Apo yo.

¹¹Kaariari ya kaipoipogaw, dayawen yos sisya, dakayo am-in ay opisyal ya turay isnan daga.

¹²Dayawen yo ay babbaro ya babalasang, anan-ak ya nataengan.

¹³Amin kayo, dayawen yos sisya, tan sisya di kangatoan sin amin ay wada, napigpigsa di panakabalina mo din amin ay wadas nan daga ya ed daya.

¹⁴Pinapigsa na din ipogaw na ay Israelita, ay patpatgena ya laylaydena, ta say idayaw da am-in sisya. Madaydayaw si Diyos!