Süleymanin Məsəlləri 7:5-25

⁵Onlar səni əxlaqsız qadından, Şirindilli yad arvaddan qoruyar.

⁶Evimin pəncərəsinin şəbəkəsindən Mən bayıra baxırdım.

⁷Bir dəstə cahil gənc arasında Qanmaz bir cavanı gördüm.

⁸Bu qadının evinin tininə yaxın küçədən keçirdi, Onun evi olan yolla gedirdi.

⁹Alaqaranlıqda, gün batanda, Gecə düşəndə, hava qaralanda.

¹⁰Fahişə libaslı, qəlbi fitnə dolu bu qadın Dərhal onu qarşıladı.

¹¹O hay-küyçüdür, o bihəyadır, Öz evində oturmayandır.

¹²Gah küçəyə, gah meydanlara çıxar, Hər tin başı bir pusqu qurar.

¹³O, oğlanı tutub öpdü, Həyasızcasına belə dedi:

¹⁴«Ünsiyyət qurbanı kəsməyə borclu idim, Əhdimə bu gün əməl etmişəm.

¹⁵Ona görə səni görmək üçün qarşına çıxdım, Səni çox axtardım, axır ki tapdım.

¹⁶Yatağıma Misir kətanından toxunan Əlvan üz çəkmişəm.

¹⁷Yorğan-döşəyimə Mirra, əzvay, darçın səpmişəm.

¹⁸Gəl sübhə qədər doyunca sevişək, Eşqdən məst olaq.

¹⁹Ərim evdə yoxdur, Uzaq bir səfərə gedib.

²⁰Pul kisəsini götürüb, Evə ay bədirlənəndə qayıdacaq».

²¹Fəndlər işlədib onu tovladı, Şirin dilə tutub yoldan çıxartdı.

²²Kəsilməyə aparılan bir öküz kimi, Kəməndə salınan bir maral kimi Bu oğlan o qadının ardınca düşdü.

²³Axırda ciyərinə bir ox saplanacaq. Uçub tez tora düşən quş kimi Bu oğlan da canının alınacağını bilmirdi.

²⁴İndi, ey övladlar, mənə qulaq asın, Dilimdən çıxan sözlərə laqeyd olmayın.

²⁵Qoyma qəlbin o qadının yollarına meyl etsin, Onun yoluna dönmə.