Süleymanin Məsəlləri 6:16-33

¹⁶Rəbbin zəhləsi altı şeydən gedir, Yeddi şey var, ondan ikrah edir:

¹⁷Təkəbbürlə baxan gözlər; Yalan danışan dil; Nahaq qan tökən əllər;

¹⁸Məqsədi şər olan ürək; Şərə çatmaq üçün qaçan ayaqlar;

¹⁹Nəfəsini yalanla çıxaran yalançı şahid; Qardaşlar arasında nifaq salan şəxs.

²⁰Oğlum, atanın əmrini yerinə yetir, Ananın öyrətdiklərini atma.

²¹Onları qəlbinin başına yapışdır, Həmişə onları boynuna bağla.

²²Gəzəndə onlar sənə yol göstərər, Yatanda səni hifz edər, Oyananda sənə məsləhət verər.

²³Bu əmr çıraqdır, bu təlim nurdur, Tərbiyə üçün edilən məzəmmət həyat yoludur.

²⁴Bunlar səni pozğun qadından, Şirindilli yad arvaddan qoruyar.

²⁵Onun gözəlliyinə aşiq olma, Onun kirpiklərinin əsiri olma.

²⁶Fahişənin üzündən insan bir tikə çörəyə möhtac qalar, Kiminsə zinakar arvadı insanın qiymətli canını ovlar.

²⁷Bir kişi qoynuna od alanda Əyin-başı yanmazmı?

²⁸Köz üzərində gəzənin Ayaqları bişməzmi?

²⁹Qonşusunun arvadının yanına girənin də halı belədir, O qadına toxunan cəzasını çəkər.

³⁰Qarnını doydurmaq üçün ac oğru oğurlarsa, Kimsə onu qınamaz.

³¹Amma onu tutsalar, yeddi qat ödəməlidir, Evinin var-yoxunu verməlidir.

³²Qadınla zina edən qanmazdır, Özünü məhv etmək istəyən belə edər.

³³Bu kişinin nəsibi kötək, şərəfsizlikdir, Biabırçılığı üzərindən silinməz.