Süleymanin Məsəlləri 30:14-24

¹⁴Adam var ki, dişləri qılınca bənzər, Elə bil çənəsinə bıçaqlar düzüb, Yer üzündən məzlumları udar, İnsanların içindən fəqirləri məhv edər.

¹⁵Zəlinin iki qızı var, «Ver, ver» deyib bağırar. Üç şey var ki, heç doymaz, Dörd şey var ki, «bəsdir» deməz:

¹⁶Ölülər diyarı, qısır bətn, Sudan doymayan torpaq, «Bəsdir» deməyən alov.

¹⁷Kim ki atasına rişxənd edir, Anasının sözünə xor baxır, Dərələrdəki qarğalar onun gözlərini deşəcək, Qartal balaları onun bəbəklərini yeyəcək.

¹⁸Mənim ağlım kəsməyən üç şey var, Anlamadığım dörd şey var:

¹⁹Səmada qartalın yolu, Qayada ilanın yolu, Dənizdə gəminin yolu, Kişi ilə gənc qadının yolu.

²⁰Zinakar qadının da yolu belədir: Yeyər, ağzını silər, «Nə pis iş görmüşəm ki?» deyər.

²¹Yer üç şeydən lərzəyə gəlir, Dörd şey var ki, ona tab gətirmir:

²²Qulun padşah olması, Sarsağın doyunca çörək tapması,

²³Nifrətəlayiq qadının ərə getməsi, Qarabaşın öz xanımının yerinə keçməsi.

²⁴Yer üzündə dörd şey var, Kiçik olsa da, hikməti çoxdur: