1Tsain futsari un mato yoi. Tsoan Jesús Ifo huafiashocai ahuun tsain shara atirifi tapisharataima matofu ichanainton, —¡Aicho! No fu ichananhuun, —huacahuun. Man shinain cuscan shinanyamaiton afu fochishmanantananyamacahuun. Aqui tsain chaca huayamacahuun.
2Mato muran ishon futsan yoitiro isca huaquin, —Un Jesús icoinra huashon nantifi tushu shara un pitiroran, —ishon yoitiro. Ascan futsan yoiquin isca huatiro, —Unfin Jesús icoinra huaquin uncai nami pitiroma. Yonosifin un pitiroquin, —ishon yoitiroquin.
3Man nantifi pitiroquin a yonosi pitirohuunoa shinanchacayamacahuun. Nanscarifi aquin man yonosi pimisiquin a nami pimisihuunoa isca huaquin shinanyamacahuun, —Atofin chaca huaiquin, —ishon yoiyamacahuun. Upa Diosin nantifi nanscarafosi noco imani non ahuun facufo non inon. Ascacun futsaqui tsain chaca huayamacahuun.
4Jesús icoinra huafocai maton oinmatima. Upa Dios fustina. Ascacun atoqui tsain chaca huayamacahuun. Upa Diosin ato tapimatiro cayacafi shinanyamaraquimain amaquiri shinancaniquin. Afin ato tapimatiroquin isharanonfo.
5—Moisés nocon caifo yononi rato shafatamain non ichanantiroquin Upa Diosihuunoa shinanshquin, —atirififain Jesús icoinra huafoan anori shinancani. Ascafia atirififain anorisi shinancanima. Shafatifi ichananfo Upahuunoa shinanshcaquin. Ascacun nantifiton maton nomuran man shinain cuscan acahuun.
6Atirifoan shinanfo rato shafatamain ichananti shafa shara itiroquin Upa Diosihuunoa shinanshquin. Nanfoanri nocon Ifon Jesús shara huapaicani. Ascan futsafoancai anori shinancanima. —Shafatifi nanscarafosi non Diosinhuunoa shinantiro. Ascatari nan ratoran shafatafin non nami pitiroquin. ¡Aicho! Upa Diosin min noco nami inanquin non pinon, —ishon shinantirofo. Nanfoanrifi nocon Ifo Jesús shara huapaicani. Ascashon futsafoan nami piyamaifoan yonofosi pitiro. Nanfoanri noco Ifo Jesús, —¡Aicho! —huatirofo. Nan rafutan Dios shinansharapaicani.
7Non niyoshocai nofin non apaiyai cuscan fusti non shinantiroma. Upa Diosin noco amapaiyai cuscan non shinantiro. Nonfin ahuunafoquin. Nanfin nocon Ifonquin. Noncai nofin catontiroma rato shafatamain non naicain. Ascan niyoshon iyamarai non naitianri non nocon Ifonna. Niyoshon non nocon Ifo tanasharapai nocoqui unimanon. Non naitian non nocon Ifo shinantiro non ahuunacoin.
9Criston noco nashoni. Maia murannoashu funicainshquin. Ascan natian man nia. Non niano yafi non nano nocon Ifo iishquin.
10¿Ahuuscain icoinra huaa futsan ahuun ifo man ipaiyai chaca huayamaraquin shara huairan huashquin? ¿Ahuuscain futsahuunoa man shinanchacamun? —Aacai ahuamaran, —ishon man shinan. Ointiaquimayamacahuun nantifi non chipo Dios icano aqui nocoicaicain. Nantian noco yoishquin nonmain shara huayamaraquin non chaca huamisiquin.
11Nannori Diosin tsain Isaías cununi isca huaquin, “Iconcoin un niaquin. Iconcoinri nantififain manifoanna anoafo uqui nocoshcani ua ratoconun mai chachishon yoishcani, ‘Diosin, icon min Diosinran,’ ishon nantififain ua yoishcaniquin.”
12Ascan nantififain non Upa Diosin ointaifi non amisi cuscan noco yoifain non shinanmisi cuscari noco yoipacushquin.
13Ascacun afanan icoinra huafohuunoa tsain chaca huayamacahuun. Noncai ahua chaca huaima noco oincashon arifi chaca huanonfoma.
14Jesús uhuun Ifocun un mato yoisharapai. Mun icoinra huacoinna nantifi yonosharafo non nami sharari non picucai noco chaca huamaima. Ascafia tsoan ahuun nomuran shinanquin isca huai, —Un na tushu piquin un chaca huatiroran, —ishon shinanquin atocai tushu pitiroma. —Un pishon uhuun nomuranshon un shinanchacatiro, —ishon yoitiro.
15Mi futan Jesús icoinra huaton ointaifi a nami min pitiroma piyamacahuun ahuun nomuran shinanchacanonma. A noishocai min ahuun ointaifi min pitiroma. Nocon Ifon Cristo ahuunoashuri nani. Ascan a pitiroma piquin min futsa shinanchacamatiro. Ascacun ahuun ointaifi piyamacahuun Jesús cachiquiri huanonma funoshquima.
16Man acai cuscan man shinanraca sharacoin. Ascan futsafoan oinquin shinanchacanonfoma shaturiscacahuun matoqui shinanchacanonfoma.
17Ascano shinancapon. Non pifain aqui ayafain non huatocai nocon nomuran noco shinansharamatiroma. Upa Diosin noco iquinano non ahuun Yoshin Sharahuunshon Jesús cuscara isharacain nocon ointi non unimacointiro.
18Nocon Ifo Jesús non yonoshosharaino Upa Diosin nocoqui fasi unimasharatiro. Yorafoanri nocohuunoa shinansharatirofo.
19Ascacun icoinra huaa futsafo ya icoinsharacahuun. Jesushuunoa shinanmatanancahuun a cuscara shara iishcaquin.
20Icoinra huaa futsafoan tushu futsa piyamaiton aton ointaifi a tushu piyamacahuun. Diosin yoini nantifi tushu sharafiacun aton ointaifi piyamacahuun. Man piquin aton nomuran man shinanchacamatiroquin. Ascaquin man ato pacumatiroquin afanan Jesús tananonfoma.
21Ascan icoinra huaa futsafoan shinanquin isca huaquin, —Diosin yononi cuscan un nami pitiroma. Un ahuara pauri ayatiromaran, —ishon shinanquin shatucahuun ato pacumashquima. Ahuarafoan ato pacumatiro shatucahuun pacunonfoma.
22Ascano afohuunoa man icoinra huaa cuscan marusu maton nomuran shinancahuun. Upa Diosin fustifin man yoitiroquin. Man man tapian nantifi man acai cuscan nanfo sharacoin. Ascafiacai atirifoan tapisharataicanima. Ascano pifain ayafain huaquin mato nomuran man shinantiro man chaca huaa cuscan. Ascafia shatucoianshufin maton nomuran man unimatiroquin.
23Ascashon tsoan ahuun nomuran shinanquin isca huai, —Afo piquiraca un chaca huaicati, —anori shinanfiaquin piriaquin chaca huatiro. Tapishoma shara iyamarai chacafiacun un pia. Ahuara futsan tapishoma aquiraca, —Un chaca huaicati, —ishon shinantiro. Tapishoma aaqui chaca huai.
