1Mitio gegec bititicne jueŋgopieŋ jaŋe âgo miriŋ ejarenʒepieŋ, ehuc wiac omanere memeŋgaru epie mu qâsuac mi ejarenʒepieŋ.
2Moc e manabâc tâmiric wiac kosa nâekac, moc e ine memeŋgaru ehuc monʒaŋ sawa nâekac.
3Irec wiac kosa nâocmuzi âgo‐ticne nâ bâtâc eekac eremaname wawahane mi ezejec, â nâ bâtâc eocmuzi âgo‐ticne wiac kosa nâekac ere maname mi sâqorezejec. E Anuture ŋic jaha wâc.
4Irec go wemogezi mocte kiŋaŋ qaqa miti babaju‐ticnere fuŋne mutec sâckeocmu? E sanaŋkeocmu me dockeocmu, i Wofuŋ‐ticnere wiac. Erâ e mi dockeocmu, Wofuŋ e sâcne hume keteŋ ecneme qiŋ herâ domaocmu.
5Â ʒoaŋ gie bapare iŋuc jaha, moc e wose bâtâc eocmu, â moc e maname qâfâsâeocmu. Moczi me moczi iŋuc me iŋuc ezo murâ mana sanaŋkehuc ezejec.
6Ʒoaŋ gie bapa wose bâtâc eekaczi Wofuŋte erâ eekac, â nânâ kosa nâekaczi Wofuŋte erâ eekac wâc, ehuc Anutu nânâre daŋge âzâcneekac. Â nâ bâtâc eekaczi iŋuc jaha Wofuŋte erâ eekac, ehuc Anutu daŋge âzâcneekac wâc.
7Nâŋâcnaonec moczi moc e jahacnere mi juekac â e jahacnere mi hâmoekac.
8Juju i Wofuŋte jueŋgopeneŋ, hâhâmo i Wofuŋte hâmoeŋgopeneŋ. Irec junaŋmu me hâmonaŋmu i Wofuŋtea enaŋmu.
9Irec hâcne Kristozi hâmokicne â ɋâricne mâmâc Wofuŋ enâreocte hâmorâ wâc ɋârewec.
10Eme go wemogezi âgogere dâŋ mutaracmu? Me go wemogezi âgogere manatec wawahane eocmu? Nâŋâc mâmâc sasawa Anuture maio fuapene dâŋnâŋec mutara‐nâreocmu.
11Ʒiŋuc hâcne qâreŋkekicne fokac: “Wofuŋzi mukac, no jujâmbâŋkekopacte ŋic ʒeŋgoma dieŋzi henare‐fârenʒepieŋ â ʒeŋgoma micjeŋiczi muafecnunʒepieŋ.”
12Irec nâŋâc mâmâc sasawa Anuturao fuŋne‐nâŋec munaŋte munârekicne hâcne.
13Irec nâŋâc dâŋ mumutarac mi enʒepeneŋ. Kecʒiŋuc ine ezo: Ŋoŋe âgo gâcne maŋ bâsifuc ejarehuc mamana sâqoc bâfua‐jarenʒipiŋte manabâcko junʒepieŋ.
14No Wofuŋ Jesuhec juekopaczi ʒiŋuc mana sanaŋkekopac: Nânâ i me i nâhuc wâwânâŋhec eene mi fokac. Â moc e, wiac kosa nârâ wâwânâŋhec ezo, iŋuc muhuc sifu nâocmu, e ine jâmbomac wâwânâŋhec eocmu.
15Go ine âgoge nânâre busâqoc bâfuacnetec maŋjauŋ micke‐garezo. Âgoge biaŋkeocte Kristozi ere wâc hâmowec, go irec manasuhuc âgoge nânâre erâ ba imac mi ecnezemec.
16Ŋoŋe wiac fârine bajuŋgopieŋ i ŋic gâcnezi musoriŋkenʒipiŋte soŋaŋkehuc bajunʒepieŋ.
17Nânâ qowizi Anuture uucmaŋte fârine mi ekac, kiŋfâsâc fufua â wama â Tiri Mâroraonec ʒeri bubiaŋ izi wiac fârine.
18Moc e hata i âtehuc Kristo kiŋaŋ qacneme e Anutuzi honeme biaŋkeocmu â ŋic jaŋe ere manapie sâckeocmu.
19Irec hâcne nâŋâc wama foocte â miti maŋ sâc fua bâbâriŋ eocte hehesanaŋ enʒepeneŋ.
20Go nânâre erâ Anuture gie ima mi qazemec. Nânâ qowi i biaŋne sasawa, moc e ine, nârâ maŋbâiŋ gie bapemu, iŋuc manahuc sifu nâme sâqorecneocmu.
21Go âgoge maŋbâiŋ ecnezicte ere erâ qowi â waiŋ opâ qikiŋnetec sâckeocmu.
22Go wiac iŋucnere maŋfâsâcge fokac, i Anuture maio bajutec gahacnao sawa fozejec. Mo e wiac mocte maname sâckeha maŋbahac fâfâsâc eme biaŋkeocmu.
23Â moc e mana maŋjahec eipiehuc sifu nâme sâqorecneocmu, e mamanasiŋ faio me ekac irec. Wiac i me i mamanasiŋ faio mi epene bahacnehec eocmu.
