1Kumata le tool be itara lono medana pang Kirisi, bong ikodo le imede tiap nga, ngan kakauu lapau a kaye kagauagaua. Bong be nen nga, ngan kin kaye kaparsu ye betebetanga ye dada tani yo lon taru be dook too dook tiap, in be.
2Kakamata, tool atu in itara lono le imede pang Kirisi, nen le so le imot nga dook mata panga ke be ikan. E tool san yo itara lono medana, bong ikodo le imede tiap i, in itattadai nen, o Maro igunkala be ikan asara medana tiap, le ole ipas le ikan sokorai kaningi leu.
3Le tool yo so le imot ngan dook mata panga be ikan i, in ke be matan ru tool san yo ikan asara medana tiap i, in tiap. Inbe tool yo ikan asara medana tiap i, in ke be lon wete be tool yo ikan so nga le imot in ikapsap ye noonoo le dook mata ngan ke be Maro iyemenaii ye, ngan tiap. Yesoo, tool yo nen i, in Maro lono dook mata panga a ikauu panga lapau.
4Ngan la ong i tool belei a be kuwete kapraingi ke tool san in iyei urata dook tiap nga? Ngan tool kuto mai ki leu la ole iwete be kapraingi ki in iyei urata dook mata, too iyei urata dook tiap i. Ngan nen le kapraingi yo ke Tool Mai i, in ole iweta be ya in iyei urata dook mata, yesoo Tool Mai ke be ipamede le ikodo le imede inbe iyei urata yo ki nga.
5Ngan gaongo leu, tool atu in ole lon wete be ke atu in maiyoko ye Maro matana le illos di ke kapala. E tool san in ole lon wete be ke tina nga le imot ngan gaongo leu. Ngan dook mata, bong di atu atu ole tikanamai di dook ye soo so yo lodi wetewete ye nga, ngan itoo Maro lono, too tiap.
6Le sei tool yo lon wete be ke atu in dook mata panga be isung ye i, in isung ye ke tani a be nen ngan Tool Mai lon ponana ye. Inbe sei tool be ikan asara medana i, in iyei nen a be nen ngan Tool Mai lon ponana ye, yesoo ya in iwete lo ponana ki pang Maro ye. Inbe sei tool yo ikan asara medana tiap i, in iyei nen a be nen ngan Tool Mai lon ponana ye lapau, le iwete lo ponana ki pang Maro ye.
7Ngan idi tina nga sa ke be iwete be yepongo ki yo ke tana i, in be nen a nen ngan iyepe a ya taunu iyei mai panga, ngan tiap. Inbe idi tina nga sa ke be iwete be matenge yo ki i, in be nen a nen ngan ya taunu iyei mai panga, ngan tiap lapau.
8Nen le kumata be tayepe matada rerene go nga, ngan be tayeie Tool Mai a lon ponana ye yepongo kiidi. Inbe kumata be tammata nga, ngan be tayeie Tool Mai a lon ponana ye matenge kiidi lapau. Ngan nanga, kumata be idi nga tayepe matada rerene go, too tammata, ngan idi nga ke Tool Mai leu.
9Yesoo, ye punu yo a le Kirisi imata motong imaur mulu ye i, in be nen a iyei Tool Mai pang di tooltool le imot yo timmata nga, inbe yo timaur nga.
10Ngan ong in soo tool a lom wete be em atu in tool ke yeingi noonoo le dook mata be Maro iyemenaii ye nga? Too, ong in soo tool a be matam ru di diem nga? Ngan idi le imot nga ole takodo dama ke Maro ye kookoowoo ki, inbe ikarata betanga kiidi.
11Le dawa ben betanga yo tiwodo a iken ye Rau ke Maro nga, “Au i Tool Mai yo ayepe nen le taukak motingi i. Inbe awete betanga medana nen: Di tooltool nga le imot ole tigun turudi ke dama kiau, inbe di le imot ole tiwete nen, ‘Moolmool, ong in la Maro i.’ ”
12Le moolmool, ye kene tani in idi tina nga atu atu ole idi taudu tawetewetidi pang Maro ye dada kiidi yo tayei nga.
13Ngan nanga, kin lod wetewete be dada yo ede san iyei, ngan dook tiap le dook mata be Maro iyemenaii ye, ngan dookoot. Bong dook mata ki ngan ole idi taudu lod mede be tayei dada yo ke be di diede titoo idi ye ngan tisaurai ye a timol, ngan be.
14Ngan au i atara lok medana pang Tool Mai Yesu Kirisi, inbe ya in ipagalanga lok le lok galanga moolmool nen: So le imot yo ke kaningi ngan sa yo dook tiap ke be takani tiap, ngan tiap. Bong kumata le tool atu lon tar be so in giri leu le dook tiap ke be ikani tiap nga, ngan kin ikawai ye dook leu, yesoo kumata le be ikana so tani in nga, ngan ya in ikapsap ye noonoo.
15Inbe ong in, kumata le kono so atu la em yo ikanen so nen tiap in matana nga, ngan ole kugarungu lono, le kutoo dada yo be lom panga mai san ye in mulu tiap. Le kin kuyeie em yo Kirisi imata ye koot i, in a be ilene ye so yo kon, nga be.
16Le kakamatang dook ye so yo lomim tar be ngan dook mata ke be kakan nga, ole nen ngan ang tapmim kayolo pang be di diemim tigarungang ye betanga.
17Ngan nanga, kumata be idi nga di tooltool yo Maro ipootoo di panga ya taunu be matan kala di nga, ngan ke be lod kaua urata mata ye dada ke kaningi le yinungu tiap, bong ole lod kaua urata ye dada yo be tayei tooltool noonoonoo ye matana i. Inbe ole lod kaua urata ye dada yo be Amunu Silene ikaua lo silene ki paidi a iyei lodo a lod ponana ye i.
18Yesoo, sei tool be itoo dada dook mata nen a iyei urata pang Kirisi nga, ngan ya in Maro lon ponana ye, inbe di tooltool ole tipayiti ye dada ki yo iyei nga.
19Ngan nen le ole takapye be le tatoo dada dook mata yo be taye di diede tagauagaua dook mata ye i, inbe tapamadit di diede lodi a be tikodo le timede ye lodi medana yo titaru i.
20Le kukawai dook leu, ole nen ngan so yo koni i, in ole igarungu urata yo Maro iyeii pang em i. Moolmool, so ke kaningi nga sa yo be dook tiap, ngan tiap, bong kumata le kono so yo em in ke be ikani tiap le imol ye noonoo nga, ngan ong in kuyei noonoo lapau.
21Ngan kumata le be kon asara medana, too kuyin ran medana yo wain i, too kuyei so kapala mulu le be em atu imol ye noonoo nga, ngan dook mata be kin kuyei nen mulu be.
22Nen le so yo kutara lom medana be ngan dook mata too dook tiap nga, ngan koptutong dook le iken kataunu yong kuye Maro leu. Ngan tool yo lon galanga moolmool ben so yo iyei ngan dook mata nga, ngan ole Maro iyei dada dook mata panga le lon ponana ye, yesoo ya taunu lon wetewete ye ngan ke be igarungu ye so yo iyei, nga tiap.
23Bong kumata be tool atu lon rru ye so yo ikan nga, ngan ya taunu igarungu, yesoo ya in itara lono medana be so ngan dook mata ke be ikan, nga tiap. Le so le imot yo itara lono medana be dook tiap bong iyei nga, ngan ya in ikapsap ye dada dook tiap ke noonoo.
