LOMU 14

1

2

3

4

5

6

7

8

9

10

11

12

13

14

15

16

¹Monokau dabuha molamitabolawasida maya wasa jibitamiki dilipi lalo ibitalo. Sa-ikiki aya nesamuya data lowe kikiki lowa moila li soto molatae loko minamiye.

²Maloka wewenasiya monokauya elewole oko minune likiki nodenesa maya opa-napa nikaka niayoko, ito maloka monokau dabuha molamabosiya nodenesa aito-aitomidana nikadanaki, jamidana milawa maya namae.

³Sa-ikaka niayoko, muki nodenesa nokaka noibo we hetoka welimoya, iwela nodenesa maloka moseko nokaka noibo wemidanamuya muda aha nesa amideyo. Ito ja milawa mosekaka noibo Juda welimoya iwela mako opa nokaka noibo wekiya Omaimidana oluhola maya nenako, aya wemidanamuya auha meko mesaha jetamideyo.

⁴Yamuya wewena makolimoya Omaimidana elekele otoko monoka noelitiboya nena weukaloti monawala ohu jeko le soto moloko ade etupeko letane. Aya weya elewole etibo nehe ito abuha molametihe yawaya ujapa wemidana yowanula nenako, We napaya he elowo oletokaka noibo elewoleyalaki maya nenako, he elowo omikadeko elewole oko minakolaiye.

⁵Wewena makolimoya aito aito monoka lokaka onawamuya eliyoko, yowe-mina leme-mina okaka noiye. Ito wewena makolimoya muki onawamuya eliyoko yowe-mina leme-mina amoko makoko aweyaha oko ne. Sa-oneboya, muki wewenasiya yamidana mamidana etune liki maya data kiki elewole ikiki sa-itayo.

⁶Monoka onawa makomu eliyoko yowekaka noibo wewenalimoya Omaimuye loko sa-okaka noiye. Ito aito aito nodenesa opa-napa leko nokaka noibo wewenalimoya Omaidamuye loko sa-okaka noiye. Sa-noidanaki, aya nodenesaya Omaimidana epoka lokoko leko nokaka noiye. Ito nodenesa maloka mosekaka noibo wewenalimoya Omaimuye loko sa-okaka noiye. Sa-noidanaki aya wewenalimoya Omaimidana epoka lokaka noiye.

⁷Lemokutiya wewena makolimo eimoladamugo ata keko minokaka amiye. Ito eimoladamugo ata keko helekaka amiye.

⁸Minoko leko okaka noudawoya We napamidana elekelela otoko minokaka noune. Helekaka noudawoya, We napamidana elekele oetoko helekaka noune. Sa-onenako, lomudakiya minokoko ito helekolo noudanakiya, We napamidana oluhola minudanako, iwetele monawanipomuya lade itupeko lametune.

⁹Kalaestikahoya aha lomudaki minudawo wewena ito helebo wewenaki magoina We napate minakolo helekoko aku sinone.

¹⁰Lemo mukiya Omaimidana omudaloya soto pekuniyoko, gate maya loko hukoletakolaiye.

¹¹Yamuya monoka bukuguya sa-liki luhuwa mako ji-minabo maya ne: We napalimoya nemoya minowa minowa oko mino-loko niseko minobo we maya minonako, muki wewenasiya di bola hi nimiki Omaimidana uliwa li sawa jiki litae loko liye. Sa-onenako, emoya nena nenako iwekadaya gala loko hukotatane, ito nenahakaloti iwekadamu elideko limitiye.

¹²Lemo muki wewenalikaya Omaimidana omudalogoya lihimate lo soto molatune loko lonebo maya ne. 3 Kol 2:16 10 2 Kol 5:10 11 Aes 45:23

¹³Sa-oneyoko noloyo, iwetipolesida monawanipomu demega likaka niabo nesa maya hulalo. Iwetipolesiya monokau niwideko ganipo heko li lokaka nesama ito dilipe lahelamibo lolo okaka nesa maya aku lolo obetametune liki li hukalo.

¹⁴We napate Jisesiki magoina ouna jeko minoibo we nemoya sa-loko ele-minoe: Yamidana mamidana nodenesa nonodanaki nukamidana ilime opa etibo nesa leko le soto molamoe. Sa-oneboya, we makolimoya nodenesa mako nonoko maya nukane le opa etibo nodenesa nonohe loko ata kitibo maya, ukala le opa etibo ne.

¹⁵Emoya nodenesa opa nokoko iwekaya madona gima etibo nesa le soto moloetokadeko, oko moloko noadawo nesaya weuka molokaka noadawo anuguya wamekolaiye. Iwekadamukiya Kalaestima helenebo maya ne. Sa-onebo maya neyo, emoya yaloka maya ata kekoko nodenesa opa natadawokumuya iwekada ilime opa amo.

¹⁶Sa-ikikiya lalo nesa lolo ikili maya maloka wewenasiya liwi letiwi ikatae liki ujapa lalo nesa iki lolo ilo.

¹⁷Omailimo ujapa oletokaka noibo onawaya nodenesa mosetupe natupe likaka niabokuya minamiye. Lihimate minametibo ito hulu oko muluteu lalo elekaka noudawo nesaya Omaimidana weuna oluholimoya le soto molokaka noibolimoya Omailimoya ujapa oletokaka noibokutima yowekoya ne.

¹⁸Ito wewena malokasiya aya anugu maya wikiki Kalaestida maya elekele itataboya Omailimo umu helideko, ito maloka wewenasikiya mudataboya dumu helekolaiye.

¹⁹Yamuya lemoya hulu soto pitiye loko emo uka mideko emo uka mideko oko labuha molatune.

²⁰Emolikaya nodenesamuye loko Omaimidana yowanula maya le opa napa amo. Muki nodenesaya nokaka nesagoya nenako, luka lupateya ma le opa napa amekolaiye. Sa-oneboya, aha nokaka nesa maya ne loko aitaya leko nokuniyoko, iwekalimoya yaya nonainako, natuwe loko leko nokoko olisa litiboya lahelamekolaiye.

²¹Emoya iwekaya olisa litiye loko ula molokataniyo, emokalikaya nodenesa ito waeni nohenaya nametadawo, ito yamidana mamidana ametadawoya wehe lekolaiye.

²²Emokahoya yamidana mamidana nesa aha lolo etuwe loko ele-minoko maya. Omaiki emokiya luwawatipouya minadeyo. Wewena makolimoya ukalimo eliyoko lahelepala elatibo nesa litibo maya, aya wewenakumuya Omailimo elowa jekolaiye.

²³Ito wewena malokasiya nodenesa natupe nametupe liki data lowe kitabo nesa maya opa nataboya, wehe letibo ne liki eli wehe lamiki data lowe kiki natabo maya nenako, lihimawa netibo nesa lolo ekolaiye. Sa-oneyo, yamidana mamidana nesa lolo noko maya wehe libo ne loko lolo etudawoya, lihimala minametibo nesa lolo ekolune. Ito sakoya lamoko lolo etudawoya, lihimala netibo nesa lolo ekolune.