Roma 14:9-19

⁹Poreso el Cristo ya muri y ya resucita para controla con el maga gente quien ta vivi pa y con esos tamen quien ya muri ya.

¹⁰Entonces nuay ni uno di ustedes debe critica con el di ustedes maga hermano na fe ni desprecia canila, cay un dia todo kita ay anda na presencia de Dios para ay jusga le canaton.

¹¹Antes pa, ya escribi ya este maga palabra na Sagrada Escritura de Dios: “Ya habla el Señor, ‘Yo mismo ta promete con ustedes que todo el maga gente ay hinca na di mio presencia, y todo el maga gente ay declara que yo amo el Dios.’”

¹²Aquel mismo dia cada uno di aton necesita dale cuenta con Dios acerca de todo el maga trabajo que ya hace kita, y necesita esplica el rason de ese.

¹³Entonces, no mas kita critica con uno y otro, sino necesita kita decidi que no hace nada para causa peca con el di aton maga hermano creyente.

¹⁴Sabe yo el cosa amo, cay unido ya yo con el Señor Jesucristo y ya dale le mira conmigo que nuay comida prohibido para conmigo, pero si uno ta cree que tal comida prohibido na vista de Dios, entonces hende bueno si ay come le ese.

¹⁵Si ta causa ustedes estorbo na conciencia del otro maga hermano por causa del comida que ta come ustedes, entonces ustedes ta dale mira que nuay ustedes el amor de Dios para canila. Poreso no debe ustedes destrosa el fe del di ustedes hermano por causa de comer el cosa prohibido para con ele, cay el Cristo ya muri tamen para con ele.

¹⁶Si tiene algun cosa que ta pensa ustedes bueno gayot para hace pero tiene quien ta habla que ese cosa hende bueno, entonces no mas hace ese.

¹⁷El maga cosas prohibido acerca de comida y de tomada hende el mas importante cosas para canaton maga miembro del Reino de Dios. El mas importante amo gayot si ay queda kita justo na vista de Dios y si tiene kita buen relacion con Dios pati con el maga gente, y mas importante tamen si tiene kita el alegria que ta sale con el Espiritu Santo.

¹⁸Si quien ta sirvi con Cristo de este manera, Dios ay accepta con ele y ay tene tamen ele el aprobacion del maga gente.

¹⁹Entonces precura kita siempre hace aquel maga cosas que ay causa con el maga gente tene paz, y ay causa canila man ayudajan para queda sila mas fuerte na di ila fe.