Rom 14:9-19

⁹Hamó, Kristoko ŋa murí ŋaro khumoro otoqoro yote, asa ŋuro tero enendo uni khumowímboya uni toŋe keta quya wiri yereweya.

¹⁰Ye do karo topokeporo oteteyó rondaŋeyote? Do karo topoke yesaráŋoyote? Qeni, nore soso Anutu toŋímo kaŋato mande khono nore norotoweya.

¹¹Hamó, sokomeko ŋuno ŋande nakayáŋaró, “Uni Parámimbo ŋande yete, ‘Hamó horé yeteno, unipare soso potoruku te nunowaŋgo, ko maŋgoyembo Anutu koro owí hokowaŋgo.’”

¹²Asa ko nore soso noreŋo yoto-yotonanimboro Anutuko piŋa mande yewato.

¹³Ŋunde ŋuroko epe ronda-ronda ma tewero. Kini, ŋande ye iŋi qembe, nore toponanimboro kheyó date roŋgaruwato khí kama saŋgawoní umbuweya.

¹⁴Nondo Uni Parámi Yesu howero kondé ŋande iŋoteno, asa o newero soso ŋuko tombí moré kini. Quko uni ka, o ŋuko o tombo naŋge, ye iŋoyote tiníqo, eneŋomboro o tombo naŋge.

¹⁵Qeno, keŋo topokepo kiyoní oka ni newonde quhurí tiníqo, keto newonde meté inowero khe qu rotaró. Kristoko topokeporo khumaró. Asa ko o neyote quwore ene ma roworemowero.

¹⁶Keto otete karo metéŋoyote, quko naru kano uni kumimbo oteteke qenero hamó piyimiŋowaŋgo, peka. Ŋuro iŋoyi qembe.

¹⁷Dokoro Anutuko nore wiri yereyote naruyó ŋuro murí muko o newero qu kini. Kini, murí muko otete roneneŋowí, ko newonde ime, ko Yuqa Surumíwore niŋgu-niŋgu tewero qu.

¹⁸Hamó, uni kato murí ŋu howero Kristo koro sunará teyote tiníqo, asa Anutuko ŋuro metéŋoyote, ko unipareto, khe u-uyó ŋuko meté, qene iŋowaŋgo.

¹⁹Asa ko kho kondé teya khe meté qu howato newonde ime tunoqiní epe samaka-samaka tewato.