ROMANOS 14:9-19

⁹Wa ngujwi Krixtu, loꞌo ngwañaꞌan wa ndyuꞌu Krixtu xiyaꞌ, chaꞌ ka biyaꞌ tiꞌ nchga nten chaꞌ Ndiose lka Xꞌnan nchga ayman nu msñi chaꞌ ꞌin Ni xa nu mdiꞌin neꞌ lo chalyuu. Kwiꞌ ngwañaꞌan, Ndiose lka Xꞌnan nchga nten nu ndyaa ñaꞌan tiꞌ ꞌin Ni lo chalyuu ni.

¹⁰Nten ꞌin Krixtu lkaan taꞌaan nu ytean chaꞌ ꞌin Ni, kanꞌ chaꞌ ja ndiꞌin chaꞌ chkwiꞌ wan chaꞌ kuxi ꞌin tñan nu ngiꞌni ska nten taꞌa ndiꞌin chaꞌ ꞌñaan loꞌo Krixtu. Ja chkwiꞌ wan chaꞌ kuxi ꞌin neꞌ kanꞌ, sa ñaꞌan nu yꞌni wan nu ngwa sꞌni, chaꞌ nu tiya ska tsan nu tyaa nchgaan la seꞌen ndukwa Ndiose. Tloo Ndiose tyituan bra kanꞌ, chaꞌ kuꞌni biyaꞌ Ni ꞌñaan.

¹¹Nde ndiya ska chaꞌ nu ykwiꞌ Ndiose nu ndukwa lo kityi kula: Ndiose luꞌu lkaǎn, ndukwin Ni, loꞌo ndiꞌin chaꞌ tyuun xtyinꞌ nchga nten tloǔn la seꞌen ndukwaǎn, chaꞌ katsaꞌ ñi neꞌ loꞌo taꞌa neꞌ chaꞌ naꞌ lkaǎn Ndiose Sti neꞌ.

¹²Kanꞌ chaꞌ taꞌaan ndiꞌin chaꞌ xkwean ꞌin Ndiose bra nu tiya tsan kanꞌ, nchga chaꞌ sa ñaꞌan nu yꞌnian kwenta skaan ti bra nu yaan lo chalyuu re.

¹³Ja chkwiꞌ wan chaꞌ chen ñaꞌan ꞌin tñan nu ngiꞌni ska neꞌ taꞌa msñi wan chaꞌ ꞌin Jesús sikwa. Nde ñaꞌan kuꞌni wan ni. Ja ta wan tyempu ꞌin neꞌ taꞌa wan chaꞌ kuꞌni neꞌ chaꞌ kuxi siꞌya wan.

¹⁴Wa ykwiꞌ Krixtu loꞌoǔn, wa jlyo tiǎnꞌ chaꞌ ja ska nan kuxi nda Ndiose chaꞌ ku nten; nchga nan nu nchku nten chalyuu, nan suꞌwe lka ran. Ndiya nten nu ja nchka ku ska nan, chunꞌ mskeꞌ tiꞌ neꞌ chaꞌ kuxi lka ran; kanꞌ chaꞌ kuxi ꞌa lka nan kanꞌ chaꞌ ꞌin neꞌ kanꞌ si ku neꞌ ran bra kanꞌ.

¹⁵Loꞌo neꞌ taꞌa ndiꞌin chaꞌ ꞌwan loꞌo Jesús, si ñaꞌan neꞌ chaꞌ nchku wan ska nan nu ja nsuꞌwi chabiyaꞌ ku ykwiꞌ neꞌ, nxkeꞌ tiꞌ neꞌ, chen ñaꞌan chaꞌ tyaꞌan tiye neꞌ kanꞌ bra kanꞌ; xkeꞌ tiꞌ neꞌ chaꞌ ja suꞌwe nka tiye wan ñaꞌan wan ꞌin neꞌ, kanꞌ chaꞌ nchku wan nan kanꞌ, xkeꞌ tiꞌ neꞌ. Loꞌo ja suꞌwe ngwañaꞌan. Ja suꞌwe ku wan nan lka nu nchka ti tiꞌ wan, si ngwañaꞌan kuꞌni wan chaꞌ kulaa yaꞌ neꞌ taꞌa wan chaꞌ ꞌin Krixtu chunꞌ nchku wan nan kanꞌ. Loꞌo neꞌ kanꞌ, lka neꞌ nten ꞌin Ndiose, ngujwi Krixtu chaꞌ ꞌin neꞌ kanꞌ.

¹⁶Ni siya xkeꞌ tiꞌ wan chaꞌ suꞌwe ti ngiꞌni wan, xa nu nchku wan nan kanꞌ, ja ndiꞌin chaꞌ ta wan tyempu ꞌin nten chaꞌ chkwiꞌ neꞌ chaꞌ kuxi ꞌin tñan nu ngiꞌni wan.

¹⁷Bra nu Ndiose lka ndloo la ꞌñaan, siꞌi ska nan nu nchkuan, ska nan nu koꞌoan nu ndloo la ꞌñaan; nu ndloo la ꞌñaan lka chaꞌ kanun Tyiꞌi Ndiose niꞌ kasiya ꞌñaan, chaꞌ ka suꞌwe kasiya ꞌñaan chabiyaꞌ ꞌin Jesús. Kanꞌ chaꞌ ka tyiꞌin tiin tian lo chalyuu, ka suꞌwe ka tiyean loꞌo Ndiose; nchga chaꞌ kanꞌ ka bra nu Ndiose ka ndloo la ꞌñaan.

¹⁸Bra kanꞌ suꞌwe xuꞌwi tiye Ndiose ñaꞌan Ni ꞌwan; kwiꞌ ngwañaꞌan, kuꞌni tnun nten chalyuu ꞌwan, si kuꞌni wan nchga tñan nu ngwaꞌu Krixtu ꞌñaan.

¹⁹Suꞌwe sikwa. Taꞌaan ndiꞌin chaꞌ tsaa naan ñaꞌan nu tyiꞌin suꞌwean loꞌo taꞌa nten nan, ñaꞌan nu ka tayaanꞌ ꞌin taꞌa ntean, chaꞌ suꞌwe tyiꞌian loꞌo Krixtu;