Rom 14:9-19

⁹Tehei kin taꞌe leꞌe: Krais nule pe, kin plihe tahar ŋaiye ka orp Lahmborenge lenge mitiŋ ŋaiye si yule, topoꞌe ŋaiye teter yarp laip.

¹⁰Detaꞌe lai ti yip de pa yiyarꞌe ŋaimune ŋaiye lenge toꞌ tatai yende no, pa yininge nange tinge yende pupwa? Topoꞌe detaꞌe lai ti yip da jonome lenge toꞌ tatai syeꞌ nange tinge yukur bwore? Poi sisyeme nange poi lalme se ya gwin wusyep kot mil ŋembep tikin Got.

¹¹Wusyep tikin Got ŋaiye sai nato tup ŋanange taꞌe leꞌe, Ŋam Lahmborenge, ŋam marp nye nyermbe. Wusyep ŋam bwore mise nal lenge miyeꞌ tuweinge lalme ŋaiye yarp kekep, ka lalme yutme ŋam pe, ka yisarꞌe ŋimbep me ŋam. Pe tinge lalme ka tambah yininge nange ŋam Got bwore mise.

¹²Taꞌe luku pe, poi sisyeme nange Got se ka ende wusyep kot me poi ilyeh ilyeh gunde ŋaimune ŋaiye poi mende.

¹³Taꞌe luku pe, yukur ya miyarꞌe lenge Kristen toꞌ tatai. Yukur ya mende ŋaiꞌe ŋaiꞌe syeꞌ ŋaiye ka ende lenge toꞌ tatai ŋaiye ka tumbe hwap, na pakai.

¹⁴Ŋam si tongorꞌ mal Lahmborenge Jisas pe, ŋam sisyeme nange ŋai lalme ki bwore nal ŋembep tikin Got ŋaiye na ono. Kom ŋaiye lahende ka ŋoiheryembe nange ŋai uku ki pupwa pe, ŋai uku ki pupwa me kin ŋaiye ka ono.

¹⁵Kut ŋaiye na ono ŋainde ŋaiye toꞌ nin ŋoiheryembe nange ŋai uku pupwa nal ŋembep tikin Got pe, luku nin si ŋende yumbune ŋoihmbwaip toꞌ nin. Yaŋah uku pe, nin yukur nungwisme toꞌ nin, topoꞌe nin yukur ŋende nihararme kin. Krais si nule ŋaiye nungwisme kin pe, yukur na ono ŋai uku no, ka ende yumbune kin.

¹⁶Yip yukur pa yusme lenge miyeꞌ tuweinge ka yininge wusyep pupwa jonome ŋaimune ŋaiye yip sisyeme nange ŋai uku ki bwore.

¹⁷Nato lemame tikin Got pe, yukur ki ŋai ŋembere ŋaiye yono ŋai topoꞌe yonoꞌe pinip, pakai. Kom nato lemame tikin Got pe, ki papararme ŋoihmbwaip bwore bwarme, topoꞌe ŋoihmbwaip ŋumwaiye, topoꞌe ŋoihmbwaip ŋaiye yarp hriphrip. Leꞌe ŋaimune ŋaiye Yohe Yirise nember nate tas.

¹⁸Lahmende ŋaiye gande yaŋah uku no, ki ŋende wah tikin Krais pe, Got ŋende nihararme ŋoihmbwaip bwore bwore kin. Topoꞌe lenge miyeꞌ ka yininge wusyep hriphrip me kin.

¹⁹Taꞌe luku pe, poi ya gunde ŋoihmbwaip bwore bwore lalme ŋaiye ki ŋende poi marp ŋoihmbwaip ilyeh. Topoꞌe ŋoihmbwaip bwore bwore luku ki ŋende bongolme ŋoiheryembe mise lenge mitiŋ.