Rom 14:9-19

⁹Yesoo, ye punu yo a le Kirisi imata motong imaur mulu ye i, in be nen a iyei Tool Mai pang di tooltool le imot yo timmata nga, inbe yo timaur nga.

¹⁰Ngan ong in soo tool a lom wete be em atu in tool ke yeingi noonoo le dook mata be Maro iyemenaii ye nga? Too, ong in soo tool a be matam ru di diem nga? Ngan idi le imot nga ole takodo dama ke Maro ye kookoowoo ki, inbe ikarata betanga kiidi.

¹¹Le dawa ben betanga yo tiwodo a iken ye Rau ke Maro nga, “Au i Tool Mai yo ayepe nen le taukak motingi i. Inbe awete betanga medana nen: Di tooltool nga le imot ole tigun turudi ke dama kiau, inbe di le imot ole tiwete nen, ‘Moolmool, ong in la Maro i.’ ”

¹²Le moolmool, ye kene tani in idi tina nga atu atu ole idi taudu tawetewetidi pang Maro ye dada kiidi yo tayei nga.

¹³Ngan nanga, kin lod wetewete be dada yo ede san iyei, ngan dook tiap le dook mata be Maro iyemenaii ye, ngan dookoot. Bong dook mata ki ngan ole idi taudu lod mede be tayei dada yo ke be di diede titoo idi ye ngan tisaurai ye a timol, ngan be.

¹⁴Ngan au i atara lok medana pang Tool Mai Yesu Kirisi, inbe ya in ipagalanga lok le lok galanga moolmool nen: So le imot yo ke kaningi ngan sa yo dook tiap ke be takani tiap, ngan tiap. Bong kumata le tool atu lon tar be so in giri leu le dook tiap ke be ikani tiap nga, ngan kin ikawai ye dook leu, yesoo kumata le be ikana so tani in nga, ngan ya in ikapsap ye noonoo.

¹⁵Inbe ong in, kumata le kono so atu la em yo ikanen so nen tiap in matana nga, ngan ole kugarungu lono, le kutoo dada yo be lom panga mai san ye in mulu tiap. Le kin kuyeie em yo Kirisi imata ye koot i, in a be ilene ye so yo kon, nga be.

¹⁶Le kakamatang dook ye so yo lomim tar be ngan dook mata ke be kakan nga, ole nen ngan ang tapmim kayolo pang be di diemim tigarungang ye betanga.

¹⁷Ngan nanga, kumata be idi nga di tooltool yo Maro ipootoo di panga ya taunu be matan kala di nga, ngan ke be lod kaua urata mata ye dada ke kaningi le yinungu tiap, bong ole lod kaua urata ye dada yo be tayei tooltool noonoonoo ye matana i. Inbe ole lod kaua urata ye dada yo be Amunu Silene ikaua lo silene ki paidi a iyei lodo a lod ponana ye i.

¹⁸Yesoo, sei tool be itoo dada dook mata nen a iyei urata pang Kirisi nga, ngan ya in Maro lon ponana ye, inbe di tooltool ole tipayiti ye dada ki yo iyei nga.

¹⁹Ngan nen le ole takapye be le tatoo dada dook mata yo be taye di diede tagauagaua dook mata ye i, inbe tapamadit di diede lodi a be tikodo le timede ye lodi medana yo titaru i.