Romanos 14:9-19

⁹Cristo que mano nda. Quera sɨ que ra. Mbia rerecuarã ngue quera sɨ ra. Mbia reco rerecuarã. Mbia mano je rerecuarã abe no.

¹⁰Nandecheẽ ɨcuã ɨcuã aroneãte nanderesenda mo je. Emo mose quia ra Dios mae tuchɨ nanderese cote. Nandechɨangui renda ra etea tuchɨ cote. Ae quia nda nandeɨcuã tea nguiã. Nandeturã abe rea.

¹¹Ã ndei embesa j i ã: Dios ndei se. Se rei sereco beɨ. Sésaa ra mbia chɨ ja ngoi ngũíã ndese. Ñee jaaja ra seje cote. “Dios tuchɨ chõ nde re”, ɨ jaaja ra seje cote, ɨ que Dios ra, ɨ que embesa ji ra.

¹²Nande ae ae ra mbae nandesenei senei Dios je aque mose. —Ã ngue asaã saã nguia seɨco mose íbii ra, nande ja ja ra ee cote.

¹³Nyebe nandecheẽ ɨcuã eã nguia nanderesenda mo nɨɨ. ¡Nandembia eãte chɨ̃ nda jẽ! ¡Mbae ɨcuã nda nandesaã uquiachɨ̃ ee jẽ!

¹⁴Jesucristo que sembaaquiatu ra. —Mbae turã ja chõ mbia chɨurã nde, ɨ que ra. —¡Co ra jẽuchɨ̃ jẽ! ɨãte Dios mbae mo nɨɨ. —Eɨcuãte co, ɨ mose emo, sã ae mɨɨ eu eã. Ae eu mose, eɨcuãte ee.

¹⁵—¡Co nandeu eã jẽ! Eɨcuãte, ɨ mose nderesenda mo ndeje, eu eã. Nde eu mose, erechesecua eã ño nguiã nderesenda rese aque. Nderesenda je abe chõ ngue Jesucristo mano ndesẽ. ¿Mbaerã nda nderesenda erembɨɨcuã ndechuubi je re?

¹⁶Ndechuubi turã ndaque ndeje. “Eɨcuãte” ɨ mose nderesenda mo, eu eã ae. Nde eu mose, mbia ra erembucheẽ ɨcuã ndechue.

¹⁷Dios chõ nandererecua cote re. Nyebe nandendua tuchɨ eã nguia nandechɨurã ndese. Ae nandembei quia, ũquɨ̃ abe rese. Dios rese quia nandendua. Ae chõ nandemingo nguiã mbae turã ndese co. Ae chõ nandechɨã mbucoi nguiã co. Espíritu turã ae nandembia mingo nguiã co.

¹⁸Eɨ̃ nande mose Cristo je, Dios ia tuchɨ ra nanderese. Mbia abe ia ra nanderese.

¹⁹Nandeɨco turã nda nandechue chã. Eɨ̃ nande nda Jesús oseɨ oseɨ uquia nandechue chã.