ROMA 14:9-19

⁹Badina be Keriso ia mase bona ia mauri lou, mase taudia bona mauri taudia edia biaguna do ia lao totona.

¹⁰To oi, dahaka dainai oiemu varavara tauna oi gwauraia kerere? Bona oi, dahaka dainai oiemu varavara oi gwauraia ia be anina lasi? Badina be ita ibounai Dirava ena Kota henia gabuna ena vairana dekenai do ita gini.

¹¹Buka Helaga dekenai ia torea hegeregerena, ia gwau: “Lohiabada ia gwau, ‘Lau be mauri Diravana momokani dainai, tui ibounai lauegu vairana dekenai do idia tui diho, bona uduna ibounai ese do idia gwauraia hedinarai lau be Dirava.’ ”

¹²Badina be ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.

¹³Unai dainai, ita ta ta dekenai do ita gwauraia kerere lasi, to iseda lalona dekenai inai bamona do ita laloa: Iseda varavara tauna ta ena dala dekenai hadikaia gauna ta do ita atoa lasi, iena kara dika havaraia garina.

¹⁴Lohiabada Iesu danu lau hakapua dainai, lau diba momokani, gau ta be ia sibona ia miro lasi. To tau ta ese bema gau ta ia laloa ia be miro, unai gau be ia miro ia dekenai.

¹⁵Bema oiemu aniani gauna dekena amo oiemu varavara tauna ena lalona oi hadikaia neganai, oi be lalokau dalana oi karaia lasi. Keriso be unai tau totona ia mase, vadaeni oi ese oiemu aniani gauna dekena amo do oi hamasea lasi.

¹⁶Bema umui laloa emui kara ta be namo, umui karaia neganai do umui naria namonamo, unai emui kara be tau haida do idia herevalaia ia dika garina.

¹⁷Badina Dirava ena Basileia be aniani gauna lasi o inuinu gauna lasi, to kara maoromaoro, bona maino, bona moale, Lauma Helaga ese ia henia gaudia.

¹⁸Bona Keriso ena hesiai gaukara inai bamona ia karaia noho tauna ese Dirava ena moale bona taunimanima edia hanamoa do ia abia.

¹⁹Unai dainai maino daladia do ita tahua, bona ita ta ta ese iseda bamona ta ta edia abidadama do ita hagoadaia.