Roma 14:9-19

⁹Bika na fu a sani disi Kristus dede èn A kon baka na libi: fu A kan de Masra fu den libiwan nanga den dedewan.

¹⁰Fu sanede yu e krutu yu brada dan? Èn fu sanede yu e si yu brada leki noti? Bika wi alamala sa tnapu fesi a krutusturu fu Gado.

¹¹Bika a skrifi taki: Na so Masra e taki: Soleki fa a tru tak' Mi e libi, na so ala kindi sa boigi gi Mi, èn ala tongo sa taki tak' Mi na Gado.

¹²Na so ibriwan fu wi sa abi fu gi frantwortu fu ensrefi na Gado.

¹³So, meki wi no krutu makandra moro. Ma kon meki un teki a besroiti fu no de leki wan ston na pasi gi un brada.

¹⁴Mi sabi krinkrin tak' na ini Masra Yesus, noti no takru fu ensrefi. Ma efu wan sma e bribi tak' wan sani no bun, dan a no bun gi a sma dati.

¹⁵Efu yu e du yu brada wan hati sani nanga san yu e nyan, dan yu no e sori lobi moro. Yu no mus meki a sani san yu e nyan meki yu brada go lasi, bika Kristus dede gi en.

¹⁶Èn no gi sma okasi fu taki ogri fu a sani san yu e feni bun.

¹⁷Bika a tiri san Gado e tiri unu, no abi noti fu du nanga nyanyan noso dringi. Ma a abi fu du nanga san bun ini Gado ai, nanga freide èn nanga prisiri san a Santa Yeye e gi wi.

¹⁸Gado lobi te sma e dini Kristus tapu sowan fasi, èn sma e taki bun fu den tu.

¹⁹So, meki wi poti wisrefi fu du sani di e tyari freide èn di kan yepi wi fu yepi makandra fu kon moro tranga ini bribi.