Roma 12:6-21

⁶A gafu ta magdaduma hapa ya amu tam ikid na kalalaki tam nga neatad na Namaratu tekitam a tarabakun tam mantu ya neatad na en nga amu tam. A am intu neatad na ta takday ya pangiuhohug na ta ipakamu na Namaratu tentu a yen mina ya tarabakun na, te awena mina ikamat.

⁷A am intu neatad na ta takday ya panguffun na ta kadwan kiden a yen mina ya tarabakun na. A ya makkamu mangituldu a mangituldu la.

⁸A ya makkamu mangpaturad a mangpaturad hapa la. A ya makabalinen nga mangatad a awena mina iituk ya neatad na Namaratu tentu. A ya makkamu mangtaron ta tarabaku na kadwan kiden a ikakinan na mina ya pangtaron na. A ya mangikallak hapa ta mazigatan a awena mina igitta ya kallak na en ta kuman na pagatut, te malogon la mangikallak.

⁹A mappya hapa ta sa mangidduk kam ta kakurugan na pangidduk, te ikatupag muy mina ya ngamin dulay a pake itug muy ya mappya.

¹⁰A magkaid-idduk kam hapa ta kuman na magkakabagis, te nonotan muy apolu ya kadwan kapye muy nonotan ya bari muy.

¹¹A awemuy mina matalakag ta patarabaku na Namaratu tekamuy, te malogon kam mina gafu ta intu ya magpatarabaku tekamuy, a ikakinan muy ya ngamin tarabaku muy.

¹²A awemuy magdamdam, te kanayun matalak kam la gafu ta pagtoli ni Afu Hesus. A maski am anu ya pagzigātān muy a attaman muy la setalak, a awemuy magimmang makimallak.

¹³A am mazigatan ya kabagis muy kiden nga mangurug gafu ta awan tekid, a uffunan muy kid hapa, a pagdulotan muy hapa ya ange kiden magpasyar ta bali muy.

¹⁴A kumanen hapa am itta ya makitapil tekamuy a “Maski ikatupag nak a mappya yak la teko,” kummuy, te awemuy igaged, a pakimallak muy hapa.

¹⁵A am itta ya matalak, a sa matalak kam ngamin. A am itta ya madamdam a sa damdam muy ngamin hapa.

¹⁶A awemuy hapa idaduma ya ikattolay muy, te igitta muy kid ta kuman na bari muy. A awemuy hapa pahig ta mapmappya kam ammi ta kadwan kiden tolay, te makikofun kam la ta ngamin tolay maski am kuman na neduma kid tekamuy.

¹⁷A awemuy hapa isupapak ya dulay ta dulayen, te dana nonotan muy am anu ya mappya ta uray na kadwan kiden tolay.

¹⁸A awemuy hapa makitabtabbag ikid na makitapil, te paruban muy mina ya makikofun ta ngamin tolay.

¹⁹A awemuy hapa magbalat, kahkahulun, awa indagan muy hud la ya pangbalat na Namaratu ewan, te yen ya uhohug na ta surat na aglavunen: “Iyak sangaw ya mangbalat, a iyak ya magsupapak,” kunna.

²⁰A kumanen am mabisin ya mangikatupag tekamuy a pakanan muy. A am makainum a penuman muy, te am kunna ten ya isupapak muy tentu a mamat na sangaw.

²¹Ammi am ibalat muy mina ya dulayen tekamuy a inabak na kanan mantu na dulayen. Ammi mapmappya ta ipaita muy ya mappya petta ikamuy ya mangabak ta dulayen.