Romanos 12:6-21

⁶Ecuana sa tupu teje Diusu ja ecuana tsapiapiati ai mudu cuana tiatana tu emebaja puji, cuaja mesa tsada epuani batame. Da putsu, tueda mudu quitaita cuana ecuaneseda saida a taji Diusu sa puji. Ahua quebata Diusu ja quisaquisa puji ichatana su, tu etiatani quisa saida cuana tuseda edue cuana saida quisaquisa a taji.

⁷Ahua quebata Diusu ja ilisha sa emebajaji ichatana su, tuseda puji saida pia cuana mebaja taji. Ahua quebata Diusu ja ebuetsuaji ichatana su, tuseda puji saida buetsua taji.

⁸Ahua quebata Diusu ja pia cuana nimetucheameji ichatana su, daja saida paata. Chipilu etiatani cuana sa saida neje tia taji aimue eturuca einatsu puji mahue. Ehuidusuji cuana sa jarejati neje huidusu taji. Tsahuataja cuana etsahuaji cuana sa beidaji neje tsahua taji.

⁹Edue cuana, huamahuama ibuneda mebaenitique. Be tsada mebaji ai madhada cuana. Ai saida cuana bahui meaque.

¹⁰Edue quitaita nime huamahuama ibuneda mebatique. Meiyubatique huamahuama. Daja huecha huamahuama d'eji metiatique.

¹¹Be tunada mepuji. Echua Puji Jesucristo jubida memebajaque muesumu beidaji neje.

¹²Beidaji mepuque, Diusu peje su ebia su enimeid'uatiani putsu. Micuana tijetije yatani huecuana su, metucheatique. Be Cristo tije mearijiji. Daja hue Diusu memitsuderaque.

¹³Tsahuataja edue cuana metsahuaque. Saida mebatsuque micuana sa ete su ecuinatani cuana.

¹⁴Meibunebaque micuana neje madhada eputani cuana. Diusu mebajaque paibunebata huecuana puji. Be mimi madhada metiaji huecuana.

¹⁵Beidaji mepuque beidaji eputani cuana neje tupupai. Daja huecha mepaque epatani cuana neje.

¹⁶Saida neje huamahuama meanique. Be ebia su aida mebatiji. Nimemitsida cuana neje tupupai mepuniunetique. Be ebia su bahue eni mabatiji.

¹⁷Ahua pia cuana ja micuana madhada hue yatani su, be micuaneda di eturuca daja madhada meaji. Saida, butsepi neje cristiano cuana butse su mepuniunetique.

¹⁸Saida meanipad'iichaque pamapa cristiano cuana neje.

¹⁹Edue ibuneda cuana, be eturuca mebiahuanatiji. Diusu sa bahui eturuca a taji. Uja Diusu puidha mesa quirica su: “Yama bahui ecastigayu. Daja huecha yama bahui eturuca yayu.”

²⁰Neicha Diusu puidha uja: “Ahua mique majai edhemanuani su, mihuaque. Ahua jaid'itija su, id'imeque. Ahua daja saida miada ya su, tueda ebidhuame.”

²¹Be mepishitiametiji, ai madhada cuana eturuca a putsu. Ai madhada cuana mepishitiameque, ai saida cuana a putsu.