Romanos 12:6-21

⁶Tenal anmal kurkin-purpaled-akal-akal nika-nemalbal, Pab anmalga ukchadbal. Imi tule kurkin-purpaled-nikal Pab-kaka-palchoggal, we tule Pabgin-penzhulid ega uklejadbal, Pab-kaka-palchogenab.

⁷Tenal tule kurkin-purpaled-nikal tulemal-pentagal, we tule, tulemal-pentaked-wilub. Tegin tule kurkin-purpaled-nikal Pab-igalgin tulemal-oturdagal, we tule, tulemal-oturdaked-wilub.

⁸Tenal tule kurkin-purpaled-nikal Pab-igalgin tulemal-okannogal, we tule, tulemal-okannoged-wilub. Tenal tule kurkin-purpaled-nikal tulemalga immal-napid ukegal, we tule wilub-okpineba immal-uked-wilub. Tenal tule kurkin-purpaled-nikal tummadga-toggal, we tule nuekwa immal takenab. Tenal tule kurkin-purpaled-nikal wilejakwa-tule-takedbal tule-pentagal, we tule weligwaledgin immal imakenabbal, yapadgin chul.

⁹Tenal pemal aga emal-emal pilalgubimalal, napírragwadgin pilalgumalo, melle yami taedgin. Tegin pe istar igal-iskana takenabbal. Tenal pemal igal-nueganginbi naneenabmal, pe melle igal-nued-akar nomalo.

¹⁰Tegin pemal aga muchub-muchub kwenadyob pilalguenabmal. Tenal pemal aga muchub-muchub pega-pul-tule-tummadyob aga pe-takenabmalbal.

¹¹Tenal pe melle Pabga-arpagedgin wiegumalo, tegin pe aga ulubgin pela-pela yer-itogedgin Pabga immal imabalo.

¹²Imi pemal nued wismal-choggu Pab pemalga immal-nuegan imako, al pe weligwal-itogenabmal. Tegin pemalga wilub-takleged nonikil, pe abin purtigenabmalbal. Tegin pe keg-chulgu pane-pane Pabzhe koldi-kuenabmalbal.

¹³Tenal pemal takalil Jesúsgin-kwenad-walgwen immal napi-kujii, pe we kwenadga immal uko. Tegin pe takalbalil tule peje tani, pe aga neggin we tule odogo tegin pe masgin tar-okunpalo.

¹⁴Tegin tule-chabzhul-pe-imasmaladga pe chogenabmal: “Pab pemalga immal-nuegan imakelen, nabirin.” Tenal pe melle tule-chabzhul-pe-imasmalad-ukapchemalo.

¹⁵Tegin pe tule-weligwal-itobukmaladbak pe mes weligwal-itomogo. Tegin pe tule-pukib-itobukmaladbak pe mes pukib-itomogo.

¹⁶Tenal pemal pulakwa yer-itogedgin nanemalo, melle aga istar takmalo. Tegin pe melle tummarba-itogo, tenal pe tule-polganabak aga aiyob nanemalo. Tenal pe immal-wijiidbal pe melle peyedzhe-twagdar tummarba itomalbalo.

¹⁷Tegin tule istar pe-imajal, pe melle tar-abirgin-chao. Tenal pe tulemal-wagin pel-kwapa yer naneenabmal.

¹⁸Tegin pe alamakenabmalbal tulemalbak pel-kwapa poni-nikchulidgin nanegal.

¹⁹Kwenadgan-pilalmalad, imi tule istar pe-imajal, pe melle tar-abirgin-chao, tenal pe tar-ebeo Pab sapejul we tule-oturdagal. Imi Pab-kartagin chogmodo: Pab Tummad chog: “Anpí unnila igal-nika sapejul tule-abirgin-chegal. Tenal antin keg-chulgu sapejul tule-abirgin-chemogo.” Dt. 32:35 Pab Tummad weob chogzhado.

²⁰Tegin Pab Tummad chogzhabal: Tenal tule-pebak-aichulid ukul-itogalil, pedin pul-kigma masgin tule-pebak-aichulid-okunno. Teginbal, tule pebak-aichulid kobbi-kualil, pe we tulega kobed uko. Imi pe tule-pebak-aichulidga pe mas ukel tegin pe kobed ukpalil, tule-pebak-aichulid peyedzhe pegin pinkegunoniko pe tule-nonogin chogun-kajiid urpemaloedyob.

²¹Tenal tule istar pe-imanonikil, tule-istar-pe-imajadbal pe melle tarbak urwenonimogo. Tenal tule-istar-pe-imajadga pe immal-nuegan-imakedbal pe we tule-pinzheed kanoniko.