6Una marmaris anun o God i pitar tar a kum se etabor torom dat. Osi ra i pitar tar a etabor na wasiso na poropet toromi, i wakak sur in papam nami, elar nam anun a nurnur.
7Ma osi ra o God i pitar tar a etabor sur in tene warut, i wakak sur in warut a taro. Ma osi ra o God i pitar tar a etabor sur in tene ususer, i wakak sur in ususer a taro.
8Ma osi ra o God i pitar tar a etabor na ururagot tano, i wakak sur in uragot a taro nami. Ma osi ra o God i pitar tar a etabor sur in tene etabor, i wakak sur in palos lamano torom a taro. Ma osi ra o God i pitar tar a etabor sur in mugumugu, i wakak sur in papam dekdek sur in mugu wakak a taro. Ma osi ra o God i pitar tar a etabor sur in tene marmaris, i wakak sur in maris a taro nama gasgas.
9In wakak ra anumot a marmaris torom a taro in lingmulus. Mot in nget a sakino, ma mot in pam ukai a kum petutna ra i wakak.
10Mot in nem etetalai mot elar nami ra mot nem a kum tistisi mot. Mot in urur etetalai torom mot, ma gong mot nuk pas mot ut.
11Mot in papam dekdek, ma gong a pinimot i ngoro. Mot in papam torom a Labino nama labino gasgas una balamot.
12Mot in kis langlang nama gasgas sur a kum utna ra numur a Labino in tabor mot nami. Ra mot etorom a kum mamaut, mot in tur dekdek, ma gong mot mana nama niaring.
13Ra a taro anun o God det sibo sur tu utna, mot in warut det. Mot in dekdek sur mot in gas pas a kum usiro.
14Ra a taro det ban laulau mot, mot in watung udan det, ma gong mot saring o God sur in ban laulau det.
15Ra a taro det gas, mot in gas tomo nam det. Ra det domos, mot in domos tomo nam det.
16Mot in tur tomo nama wakak na petutna etetalai torom mot. Gong mot nuk ulabo pas mot, mot in gas sur mot in kis tomo nama taro ra ka di ulabo pas a risandet. Ma gong mot nuki lena mot mananos doko.
17Gong mot balu a laulau ino nama laulau ino. Mot in nuknuk wakak sur mot in pam a petutna ra a taro det in tama lele i lena i tokodos.
18Ra i topas mot, mot in dekdek sur mot in kis na malmal nama taro rop.
19A kum paspasang, gong mot balu taio ra i pam a laulau ino torom mot. Mot in madek tari kut torom o God sur in balu i. Uni di sa tumus tar a wasiso ra a Labino i watungi una Buk Tabu lena, “Anungi kut a warkurai na minabalu. Iau an mabalu.”
20Ikut mot in pami lenri, “Ra anum a ebar i murak un tabori, ra i muruk un tabori nam lako danim. Ra un pami lenra toromi, in maimai una nun a sakino petutna.”
21Gong u madek tar a sakino sur in winim pas ui. Un winim pas a sakino nama wakakino.
Rom 12
Rom 12:6-21