Romu 12:6-21

⁶Anumzamo'a Agra'a asunkuzanteti, ruzahu ruzahu eri'zama eri'zamofo muse'zana magoke magoke'mota tamitere hu'ne. Hu'negu Anumzamo'ma kasnampa kema hu hankavema kaminesigenka, Anumzamo'ma kaminesia kamentinti avamente huama huo.

⁷Ru vahe'mokizmi zamazahu musezama tagripima menesigeta, so'e zantfa huta zamaza hanune. Hagi rempi huzame musezama erinesuta, rempi huzami so'e hanune.

⁸Iza'o ru vahe'mokizmi zamazeri hankaveti musezama agripima me'nesigeno'a, zamazeri hankavetigahie. Hagi vevahu musezama agripima me'nesigeno'a, mago'a zankuma atupama hanaza vahera zamisige'za rama'a erigahaze. Hagi Anumzamo'ma vahe kva huzamante hankavema aminesiana, agra'a ana eri'zana agu'areti huno eriso'e huno erino. Hagi vahema so'e hunte musezama erinesimo'a, musezampinti so'e zana huzmaverino.

⁹Tamage hutma vahe'mofona zmavesizmanteho. Kefo avu'avazana tamagena hunenteta, knare avu'avazana azeri hankavetiho.

¹⁰Tamagra tamage hutma ovesinte avesinte nehuta, tamagra tamavufga anteneramitama, arumokizmi husga huzamanteho.

¹¹Tamavesra osutma hanavetitma eri'zana erinkeno, Avamumo'a tamazeri otina Ramofo eri'zana eriho.

¹²Fore hanigu hankave antahintahima hunemiza zankura musena nehuta, tusi'a knazama fore'ma hanigetma kazikazi huta nevutma nunamu huvava hiho.

¹³Anumzamofo vahe'mo'zama mago'a zankuma atupa hanagetama, zmazama hanagura tro huta maniho. Onkenesnaza vahema esnageta nontamifi kehuta zamavrenteho.

¹⁴Knama tamisamokizmia asomu ke huzmanteho. Anumzamo'a asomu huramantesie nehutma, zmazeri haviza hanie hutma osiho.

¹⁵Musema hanaza vahe'enena muse nehuta, zavi'ma atesnaza vahe'enena zavira ateho.

¹⁶Ovesinte avesinte huta magoke avamente maniho. Tamagra tamavufga erisaga osiho, hianagi agi omane vahe'ene manizanku tamavesino. Tamagra ana miko'zana antahi'none huta osiho.

¹⁷Mago vahe'mo'ma havizama huramantena, ana nona'a haviza huonteho. Ana mikozama hanafina fatgo tamavutmava nehinke'za, miko vahe'mo'za tamageho.

¹⁸Tamagrama ana hugahanutma, miko vahe'enena tmarimpa fru huta manigahaze.

¹⁹Rone'nimota mago'mo haviza hurmantena nona'a huonteho, hagi Anumzamofo fatgo rimpa hezampi atrenkeno vino. Na'ankure avontafepina anage huno krentene, Nagra'a nona'a huzamantena mizana zamigahue huno, Ramo hu'ne. (Diu-Kas 32:35)

²⁰Hianagi ha'ma rermantesaza vahe'moza zmagakuma hanageta, nezana zamiho. Tinku'ma zamavesina, tina zaminke'za neho. E'i ana huknazama hanazana, zamagrama nehaza zmavuzmava zankura zmagaze hugahaze. (Prov-Knr 25:21-22)

²¹Tamagra atrenkeno havi avu'avazamo'a tamazeri agate'oreno, hianagi knare tamavutamava hutma havi avu'avara agatereho.