1Mappya mantu, kahkahulun, ta pake nonotan muy ya ngamin allak na Namaratu tekamuy, te ya pake ipasikkal ku tekamuy a igawat muy mina ya bari muy tentu, petta magserbi kam la tentu ta kuman na sitatolay na atang, te yen ya pake ikayat na, petta kakurugan ya pangdayaw muy tentu.
2A awemuy mantu parigan ya gagangay na awan kiden mangurug, te pauli muy hud la ya nonot muy petta bagu ya gagangay muy, petta amu muy hapa am anu ya uray na Namaratu tekamuy, te yen ya mappya ikid na kustu ikid na mangpatalak tentu.
3A gafu ta patarabaku na Namaratu teyak a ibar ku tekamuy ngamin ta awan mina ta mangpātā-nāng ta bari na, te mapmappya hud la ta magnonot kam ta kustu na nonot. Te am anu ya neatad na Namaratu ta amu na tagtakday tekamuy a yen la mina ya nonotan muy ikid na idulot muy.
4Intu mina pagnonotan muy ya keangarigan na bari tam, te amu tam ta addu ya ramyenta na bari tam, ammi magdaduma ya tarabaku da ikid na pagserbi da.
5A kumanen hapa tekitam mangurug, te maski am addu kitam a kuman na tatakday kitam la na bari gafu ta pagdadagga tam te Hesus Kristu. A mappya mantu ta maginguf-uffun kitam ta kuman na ramyenta na bari tam.
6A gafu ta magdaduma hapa ya amu tam ikid na kalalaki tam nga neatad na Namaratu tekitam a tarabakun tam mantu ya neatad na en nga amu tam. A am intu neatad na ta takday ya pangiuhohug na ta ipakamu na Namaratu tentu a yen mina ya tarabakun na, te awena mina ikamat.
7A am intu neatad na ta takday ya panguffun na ta kadwan kiden a yen mina ya tarabakun na. A ya makkamu mangituldu a mangituldu la.
8A ya makkamu mangpaturad a mangpaturad hapa la. A ya makabalinen nga mangatad a awena mina iituk ya neatad na Namaratu tentu. A ya makkamu mangtaron ta tarabaku na kadwan kiden a ikakinan na mina ya pangtaron na. A ya mangikallak hapa ta mazigatan a awena mina igitta ya kallak na en ta kuman na pagatut, te malogon la mangikallak.
9A mappya hapa ta sa mangidduk kam ta kakurugan na pangidduk, te ikatupag muy mina ya ngamin dulay a pake itug muy ya mappya.
10A magkaid-idduk kam hapa ta kuman na magkakabagis, te nonotan muy apolu ya kadwan kapye muy nonotan ya bari muy.
11A awemuy mina matalakag ta patarabaku na Namaratu tekamuy, te malogon kam mina gafu ta intu ya magpatarabaku tekamuy, a ikakinan muy ya ngamin tarabaku muy.
12A awemuy magdamdam, te kanayun matalak kam la gafu ta pagtoli ni Afu Hesus. A maski am anu ya pagzigātān muy a attaman muy la setalak, a awemuy magimmang makimallak.
13A am mazigatan ya kabagis muy kiden nga mangurug gafu ta awan tekid, a uffunan muy kid hapa, a pagdulotan muy hapa ya ange kiden magpasyar ta bali muy.
14A kumanen hapa am itta ya makitapil tekamuy a “Maski ikatupag nak a mappya yak la teko,” kummuy, te awemuy igaged, a pakimallak muy hapa.
15A am itta ya matalak, a sa matalak kam ngamin. A am itta ya madamdam a sa damdam muy ngamin hapa.
16A awemuy hapa idaduma ya ikattolay muy, te igitta muy kid ta kuman na bari muy. A awemuy hapa pahig ta mapmappya kam ammi ta kadwan kiden tolay, te makikofun kam la ta ngamin tolay maski am kuman na neduma kid tekamuy.
17A awemuy hapa isupapak ya dulay ta dulayen, te dana nonotan muy am anu ya mappya ta uray na kadwan kiden tolay.
18A awemuy hapa makitabtabbag ikid na makitapil, te paruban muy mina ya makikofun ta ngamin tolay.
19A awemuy hapa magbalat, kahkahulun, awa indagan muy hud la ya pangbalat na Namaratu ewan, te yen ya uhohug na ta surat na aglavunen: “Iyak sangaw ya mangbalat, a iyak ya magsupapak,” kunna.
20A kumanen am mabisin ya mangikatupag tekamuy a pakanan muy. A am makainum a penuman muy, te am kunna ten ya isupapak muy tentu a mamat na sangaw.
21Ammi am ibalat muy mina ya dulayen tekamuy a inabak na kanan mantu na dulayen. Ammi mapmappya ta ipaita muy ya mappya petta ikamuy ya mangabak ta dulayen.
