ROMANOS 12:6-21

⁶Diox ndli loo na' co' ndxela's loo Diox por cón che'n Crist xà' xà' nac co' ndxác na' li na' loo cón che'n Diox xal ndlya's Diox li thìb thìb na'. Ndxàal xo'f zin' na' zin' co' ndlu' Diox loo thìb thìb na' xal ndlya's Diox li thìb thìb na' zin'. Chele' Diox mbli ndxác ndxep na' co na' yalbàn cón che'n Diox, ndxàal co na' yalbàn cón che'n Diox xalque' nac mod co' ndxàp na' yalxla's loo Diox.

⁷Lomisque', ngue niin loo gu', ne: Chele' Diox mbli nac na' mèn co' xo'f zin' ndac thìb zin' co' nac par lyath no na' xtàa na', ndxàal lyath no ndac na' xtàa na'. Lomisque' ne, chele' Diox mblec ndxep na' par lu' na' loo hues xtàa na', ndxàal lu' ndac na' loo hues xtàa na' cón che'n Tad Diox.

⁸Lomisque', ngue niin loo gu', ne: Na' co' mblec Diox no mbli Diox par ndxác na' li na' par ye'th lezo' mèn, no tegán na' lezo' mèn loo cón che'n Diox, ndxàal li na'i xal ndxàala. Le' mèn co' ndryo' lezo' angta' mèn con' co' ndryo' lezo' mèn ta' mèn càa mèn co' nde che con' loo, ta' mèna con gust no con dib nzo yéc mèn no con dib nzo lezo' mèn. Ne'cuez nguixte mèn cón che'na yiloa. Le' mèn co' ndyoo ner no co' ndyoo naa loo xtàa na, leque mèna hui' loo mèn xá mod ndyoo ner mèn no xá mod ndyoo naa mèn loo xtàa mèn par ryo' loo con' ndac cón che'n Diox por con' ndli mèna. Le' mèn co' ndryo' lezo' lyath no mèn co' naquin con' no mèn co' ndyac yaltìi, lyath no mèn mèna con gust no con guyith guxìis.

⁹Thìb lì yéc gu' no thìb lì lezo' gu' fque' lezo' gu' gunèe gu' thìb xtàa gu' no tedib xtàa gu'. Blá' gu'. Ne'tolode li gu' chol con' ye'rsin'. Más huen, ftoo lezo' gu' li gu' con' ndac.

¹⁰Fque' lezo' gu' gunèe gu' thìb xtàa gu' no tedib xtàa gu' xalque' nque' lezo' gu' ñèe gu' huespe' gu'. Bli gu' con' guryath no con' guryèn no bli gu' cas thìb xtàa gu' no tedib xtàa gu' xal ndxàala.

¹¹Bli gu' purad loo zin' co' nac chol zin' co' ngue li gu'. Ne'gàcte gu' mèn za'f loo zin'. Gòc gu' mèn nayen loo zin' co' mxo'f zin' Tad Diox loo gu' par li gu'i.

¹²Gure gu' guyith guxìis loo cón che'n con' co' nzi quee lezo' gu' co' gàc loo gu' yiloa. Gòc gu' mèn co' ncha'la's no co' xec yèe co'se' ndxàc ngòc nguàal con' ye'rsin' loo gu'. No ndlyazen ne'yathla'ste gu' toloque' gurez gu' Diox.

¹³Blyath no gu' mèn co' ngro' xà' loo cón che'n xab izlyo', mèn co' ngòc che'npe' Diox, co' nee di's, blyath no gu' mèn co' ndxela's loo Crist loo con' nde che loo mèna. Con gust fta' gu' liz gu' cued mèn co'se' ña'b mèn loo gu' cued mèn liz gu'.

¹⁴Con huen di's con huen cuent ftoodi's gu' cón che'n mèn co' ndli ngòc nguàal con' loo gu'. Gurez gu' no bna'b gu' loo Diox par li Diox anggàc con' ndac loo mèn co' ndli ngòc nguàal con' loo gu'. No ne'nii yèede gu' no ne'nii tìide gu' cón che'n mèna.

¹⁵Thidte gòc gu' con hues xtàa gu' co' nziri' con guyith guxìis par tolo tyac lezo' gu' con hues xtàa gu'. No lomisque' ne, thidte gòc gu' con mèn co' nzi xi lezo'.

¹⁶Ndlyazen thidte gàc xtùuz gu' no lezo' gu' co'se' li gu' chol con' nde li gu'. Ne'gàcte gu' mèn nate's no mèn naxal'. Ndxe'leque', gòc gu' mèn nado'. Ne'gabte gu' loo lezo' gu' le' gu' anze'f ndxác.

¹⁷Ne'co xtàade gu' con' loo xtàa gu' xal nac leque con' ye'rsin' co' ndli no xtàa gu' gu'. Más huen, fcua'n gu' mod li gu' con' ndac loo ryete mèn.

¹⁸Bli gu' con' ndac co' nzote mod li gu' par tataa mod nabe'ste cue ban gu' rye nda gu' no rye ndye'th gu' làth hues xtàa gu'.

¹⁹Mèn huesen por cón che'n Crist, gu' co' nque' lezon ñèen, ne'co xtàade gu' leque con' ye'rsin' co' ndli xtàa gu' loo gu' loo xtàa gu'. Ndxe'leque', ftan' gu'i part che'n Diox par yub Diox co' xtàa cón che'n gu' loo mèna. Tac loo libr co' nac xti's Diox ndub di's co' mbez: Cón chenen nac co' tetìin mèn co' nac co' go xtàan loo mèn. ¡Lá'a! Tazanque' daa no yigaa mèna loon, ndxab Tad Diox.

²⁰Lomisque' ndxab Tad Diox: Chele' mèn co' nac ngolo ngola's che'n gu', co' ndxecloo ñèe gu', ngue tee lan', fta' gu' con' hua mèna. Chele' mèna ngue tee yec lezo', fta' gu' xít gu' gu mèna. Tac co'se' ngue li gu' con'a loo mèna, ten' mèna le' gu' ngue li con' ndac loo mèna. No tataa mod nthyon tín' mèna por ngue li gu' con' ndac loo mèna.

²¹Ne'ta'de gu' lugar lyàa xyàn lezo' gu' par setilte zyo' yéc gu' co'se' li mèn ngòc nguàal con' loo gu'. Ndxe'leque', más huen ftoo lezo' gu' bli gu' con' ndac par ne'lide gu' con' ye'rsin' loo mèn co' mbli ngòc nguàal con' loo gu'.