Waroma 12:6-21

⁶Mana chila imunu kana gholelo lyake kwa uluso watwing'ile Imulungu. Imunu ka keng'ighwa gholelo lye ukulonga usenga we Imulungu, yalonge kwa ukutoghola kwake.

⁷Imunu iyeng'ighwe ukuwasang'anila weyaghe, leka yawasang'anile, ka ukulangulitsa leka yalangulitse.

⁸Ka kuwakanza wamwenga, leka yatende pfipfo, munu iyolapfa, yalapfe kwa ghumoyo ghumwe. Imunu iyolongotsa, yalongotse pfinoghile, naye iyotenda chinu cha libatsi yatende kwa ukudeng'elela.

⁹Unoghelo wenu uleke kuwa wa ung'enye. Mghahile ghose ghehile, mghakindilitse aghala ighanoghile.

¹⁰Mwinoghele ka mwa wandughu, mwihulikitse wenyegho kwa wenyegho.

¹¹Mleke kuleghela hamumsang'anila Imtwatsa, msang'anileni kwa ghumoyo wenu wose.

¹²Lolelo lyenu liwatende mdeng'elele, hane maghayo mdudumile na mleke kwipfa ukulomba.

¹³Muwagholele iwanu we Imulungu pfinu pfenu, muwe waluso kwa wahenza.

¹⁴Muwabaliki awala iwomdununzani, muwabaliki, mleke kuwalighita.

¹⁵Mdeng'e na awala iwodeng'a, lileni na awala iwolila.

¹⁶Mkale pfinoghile chila imunu na miyaghe. Mleke kwighoda, ila mtoghole kukala ne iwanu mbughilambughila. Mleke kwibona mna ihekima ng'ani.

¹⁷Imunu ang'amtendelani ghehile, mwemwe mleke kumliha ghehile, mtende ghanoghile kwe iwanu wose.

¹⁸Mtende pfamdaha mkale tseghamba ne iwanu wose.

¹⁹Sale tsangu, mleke kuliha ghehile, ila mbuli ayo mlekeleni Imulungu, kwaapfila yandikighwa, Imtwatsa kolonga, “Maliho igho ghangu nene, nene nitsoliha.”

²⁰Kuya Ghamaandiko gholonga, “Imunu iyokuhila ang'awa na nzala, umwing'e ichijo ang'awa na ng'ilu, umwing'e ghamatsi yanwe. Ung'atenda apfo, kutsomghela chinyala.”

²¹Uleke kutoghola ghehile ghakuhume, ila ughahume ghehile kwa ghanoghile.