Psalms 71:2-22

²Agiring iki ale nika kiwem ningo diram mu te aga sangaru ale aga bataguru toko.

³Ni pempem aninga manga aora bager se ani te nagu nama yumurekko; ni la balu se ani terong la bagarikko, mu awuk, ni aninga manga gek am se aninga yumura kuwim.

⁴O aga Kaem, kari memek nuguting te aga bataguru toko; kari memek kiwem memek bitawara mu me aga kau tamonko.

⁵O Yawe, aninga kulak te la, ni keta suanta kete aga loagara bita lagasam.

⁶Ni aga ayam tuagu te aga bituem se tom ani bilangerem mu ani nikate la ira sanami lagasam. Ani nika nip pempem la patawu se lagarikko.

⁷Kariimet suen biya ani mel memek bo iwita agarkasan, bare ni mu aninga bitua kari aora.

⁸Ani pempem nika nip patawusam ale nika nikim sokel garagar mu ko balsam.

⁹Tom ani garukarik ale asokel kaparuk mu ni me agarki daleluwur ale due ko me aga sarumu bitarko.

¹⁰Mu awuk, kari memek aninga balu maguwusan; ale ilu biguwusan ale aga momon se kuerikko balsan.

¹¹Ale “Kaem me sangukkowo!” masan. “Iluwal ale taliparalko; kariimet bo nu me sangukko.”

¹²O aga Kaem, aga bitar ale awar biya me bagerko; tairate tair ale aga sangaruko.

¹³Kari den te aga atumusan mu dolara memek te nunga menawurko; kari aninga bita maguwumonko bagasan mu memek biya te nunga bitar se dolomonko.

¹⁴Bare aninga loagara mu pempem la nikate bita se, ka nip butata patawu se lagarikko.

¹⁵Ani nika munan ningo diram te nanga sangaru tasam mu ko iki saparikko me terong, bare tirom woremkalal ko balu se lagarikko.

¹⁶O Kaem Yawe, ani nika kiwem bibiya mu ko balikko; ani ni keta suanta ka munan ningo diram mu ko balu pagikko.

¹⁷O Kaem, ani kuriang kulak la ni ka munan ningo ningo mu aga kausem, se tai aitak mu ani am ko baluwasam.

¹⁸Se tom ani garukarik ale amone yak mauk mu ni me ta biring gurugu aisuko; O Kaem, aga sangaru se nika sokel aora garagar mu ko balik se kuriang gue luan udagi taiwasan mu ikimonko.

¹⁹O Kaem, awiri nika iwita? Mena. Nigita ni munan bibiya beterem; nika kiwem ningo diram mu taiti gomang ningi kalel biya.

²⁰Ni ikiwerem se ani ikup yaman suen biya giem; ani mutim du biya ningi iwita kaperem, bare ani ikisam ni akingtala sokel iru aisu ale aga patawur se bausekko.

²¹Ni aninga aip kaparam mu aking patawur ale angamang motam sokel tuiko.

²²O aga Kaem, Israel ko Kaem Laili, ani nika munan diram la ago ko betera mu ko gita morik ale nip patawurikko.