Godigo Nogi Ugwaba Sabo Tęąbi Po Wabo Buku Dabe 71:2-22

²Nage doloba pai mu da, tama tiyu, nago ena tau selama, tama ena te boi bidi dabego nogode ma sao. Nago eno gedu haluasa po wabo odama, tama ena ma sao.

³Nage te bomai obo tiwai elalu, tama te bomai be tiwai elalubaso, teda ena te tomoba aselama, tama nago ena tonalubao, magi baso meni, ena te nageba naga aselama, te ena duala sai. Nago naga ena bugagia tonalubaso, tama ena bugagia bidibao.

⁴Ena God, nago ena te dwai bidi dabego nogode ma sao. Augwaligo bomo mu eyu, tama augwaligo kolesaga dwai mu ebao.

⁵Genuai Bidi, eno konealubo homu nageba naga muani. Polobadu ena gesi ogwa bidide digi, te nageba konealubo homu dąų wali, tama eno konealubo homu dąų ola asali, megiba usu nagasobao.

⁶Sesemane sogo ena nago nogode naga bidiyu bilali. Idago ena ame nabode, te nago ena tonalua asali, te megiba usu nagasobao. Tama tialima, te eno sesemane sogo nago nogi ugwaba saibao.

⁷Te we bidi hauwago ena sulama, tama eno ebo sę dabede te augwali homu hauwa dogia pai. Tiali goli, te eno bomogo me ebeo. Menio. Nago naga te ena tonalubo bomo mu ebo dao.

⁸Te tigidali sogo te eno nago nogi ugwaba siyu, tama nago genuai nogi te we bidi dabeba hanilama, pusubo dao.

⁹Megi da, ena monu dabe ebaso, te eno bomo me menio, tialima tiyu, nago ena tagalama tudiba muidalio.

¹⁰Te boi bidi dabego ena ela muainu, tama augwali sisinama, tama po dąų waliyu, ena dolaibao po wai.

¹¹Augwa te tama po wali, “Ae, tegoba, dago aga pobelama, tama tola sinao,” wali. “Te aga tau sabo bidi me deli menio. Godigo aga tagalai dao,” wali.

¹²Tialima, God, nage enade digibulu me bidigio. Eno God, nage polo tama aselama, ena tau sagasao.

¹³Te enaba po kisilama wabo bidi dabe, nago augwali elaluama, tama augwali mu silao. Augwaligo ena dolainu yali, tialima, nago augwaligo homu kolesaga puna palama, tama augwali hale dwai mu emainu yao.

¹⁴Tiali goli, eno sesemane konealubo homu nageba dąų olalu, tama eno nago ena tau sabo tonalubao. Te eno nago nogi ugwaba mu saibao.

¹⁵Te eno te we bidi augwaliba te nago doloba pai kolesaga ebo po te pusaibao. Eno te nago ebo sę page tigidali te bugagia konesiąbadi digi, tiali goli tagalao, te tigidali side eno te augwaliba weyu, te nago ena ma sali po waibao.

¹⁶God, Genuai Bidi, te eno nago genuai bomode homu kone palu, tama te eno nago nogi ugwaba sobao. Eno te tiwai po waibao, “Genuai Bidi naga, aga te doloba pai dao,” waibao.

¹⁷God, nago ena te sogo te dwasianude digi ola mani, tama megi e sogoba usu nagasobao, tama eno nago te wiegi wiegi yai sę dabe ebo po pusudu gebo dao.

¹⁸Megi da, ena monu dabe elama, te ena tobolu nisi ayadeba yalio, tiali digi God, nago ena me tagagio. Nage ena dali bidiyu, tama eno nago genuai bomode po te nosali pedalubo we bidi dabe pusaibao.

¹⁹God, nago doloba pai kolesagago te tigidali badu usu nani, tama te tigidali we bidigo gedude te pepeli dilide elalubao. Nago genuai sę mu yai. Te tǫde bidi me deli te nage tiwai me elalubeo. Menio. Nago tigidali mu elaluai dao.

²⁰Nago te deli tigi poai sęgę enaba tagala palali. Tiali digi, eno koneai, te nago ena ma dąų walainu yai. Te ena gų pageba pidali weyu, te nago ena ma hodolaibao.

²¹Te nago eno nogi te genuai mu igi pomainu yali, tama nago eno haliga te dua nagame ma emainu yai dao.

²²Te eno gita me musik eliyu, te eno nago nogi ugwaba sobao. Eno God, nago ena me tagalisiąwai, nago po te mu naga dao, tama tialima, te eno nago nogi ugwaba sobao. Te Israelgo God, nage tedali wiegi yai elalubao. Te eno gita eliyu, tama tęąbi weyu, nago nogi ugwaba sabo dao.