Ola Saam 71:2-22

²Dumaji yu oldei dum wanim rait, album mi en seibum mi. Irrim mi en seibum mi.

³YAWEI, yu jidan jis laiga bigwan ston weya ai gin go enitaim blanga jidan seifwan. Yu main seifwan haus en yu fait blanga mi.

⁴Main God, yu seibum mi brom ola nogudbala pipul, en brom det pawa blanga ola krulwan en brabli nogudwan pipul.

⁵YAWEI yu det boswan God. Ai libum ebrijing langa yu. Aibin trastimbat yu brom yang taim.

⁶Ol main laif aibin larram yu hendulum ebrijing. Yubin maindimbat mi olawei brom det taim wen aibin bon. Ai garra preisimbat yu olataim.

⁷Main laif shoum loda pipul, yu na strongwan en yu oldei lukaftumbat mi.

⁸Mi preisimbat yu oldei. Mi tokabat yu dumaji yu brabli haibalawan.

⁹Nomo libum mi dumaji mi olbala. Nomo libum mi na dumaji mi wikwan.

¹⁰Main enami olabat wandim kilim mi ded. Olabat tokabat blanga wanim dei garra dum langa mi.

¹¹Olabat tok, “God bin libum im na. Wi garra go en gedim im. Nobodi kaan seibum im.”

¹²God, nomo jidan longwei. Kaman kwikbala en album mi.

¹³Yu nomo larram detlot hu kaman blanga fait langa mi win. Yu binijap olabat. Yu meigim detlot hu wandi ardim mi, sheim brabliwei.

¹⁴Ai garra oldei trastim langa yu blanga ebrijing. Ai garra kipgon preisimbat yu.

¹⁵Ai garra dalimbat ola gudbala ting weya yu oldei dumbat blanga seibum yu pipul olabat, nomeda ai nomo sabi ebrijing weya yubin dum.

¹⁶YAWEI, yu na det brabli strongwan God, en yu na bin dum detmatj ting garram yu pawa. Ai garra tokabat blanga yu dumaji yu trubala. Oni yu na ai garra preisim.

¹⁷Main God, brom wen aibin lilwan yubin titjim mi, en raidap tudei mi stil dalimbat pipul blanga ola gudwan ting weya yu oldei dumbat.

¹⁸Main God, nomo libum mi dumaji mi olwan en mi garram greiwan heya. Jidan garram mi wen mi toktokbat blanga yu pawa langa ola biginini, en olabat bigininimob wen dei garra kaman bambai.

¹⁹Blanga yu raitwei im gajimap det skai. Yubin dum loda haibalawan ting. Nobodi jidan wulijim yu, najing.

²⁰Yubin meigim trabul kaman langa mi en aibin ardim, bat yu garra meigim mi strongbala igin. Yu kaan larram mi go langa greibyad.

²¹Yu garra meigim mi jidan mowa haibalawan igin. Yu garra meigim mi jidan gudbinjiwei igin.

²²Ai garra preisim yu garram gita. Blanga det trubalawei blanga yu ai garra preisim yu, main God. Garram main gita ai garra plei ola song langa yu, det holiwan God blanga Isreil.