Sam keil 71:2-22

²Kimai kikataunau ka kiting koe nau ran tounah koa vasut nau, veni keik komal revi. Kitaengon isien onak eli ka kutut inau.

³Keik kihi out tatosuaien onak, koa nakilea mato suai ien. Kisan mengkatien keke mututien onak hemai hekistal veni naling desien onak enuk suval koa naling desien onak en eim tai koa keih imok.

⁴O Ahi onak, kikulat nau ran hen koakeil amum kalkali, ran keihoen onen koakeil amum romaltei ka apurun heisav en mesav keil.

⁵O Ahi Asuv, naling desien onak enuk. O Iahova, nakur anatin enuk navong navi havivi rokol kosa.

⁶Navarengein moulien onak enuk. Keik koro ral minau en avong avasi inau rokol kosa. Lisenges, nimasmasuk.

⁷Kosakin moulien onak suval metai tai koa meatin sav keil alesi ka aleisungeini, veni keik koring koe nau keih.

⁸En avong vasi, namasmasuk. Navitehiten hetetamenien onom lises.

⁹Konaso seseintei nau navong nihi ulmatu, konalokoveintei nau navong keihoen onak hetovuol emun.

¹⁰Vativieh keil onak avit avou vini nau, keil avit usil inau ka amumon hatkatien va kat inau.

¹¹Aviteni avit, “Ahi lokoveini ka tovuol vakatauni, sakini rovakatau usili ka rovahuli kati.”

¹²O Ahi onak, konaltei soutin ranau, kikalah kimai kikataunau li.

¹³Kisakin koakeil avit avapurun nau, imemou ka ise hetisa. Koakeil uvae kat nau, kisakin keil imemou ka ku vinvini keil.

¹⁴Ka inau, niling desien onak enuk, ka nil nimasmasuk hehi houlu vis hehi houlu mok.

¹⁵Inau, nil nihit usil umen keil onom koa mal, niselus usil sakien keil ten mututien onom lises, avaseini nasakras mahuli vasi.

¹⁶Nimai hetal masmasien ven tounah koa keik, Iahova koa kovi Ahi onomai, komumoni ral min keihoen onom. Nihit usil umen keil koa mal koa keik enges, komumoni.

¹⁷Koviseinau navong navi ehon rokol kosa, ka namules navitehiten mormore tounah koa komumoni.

¹⁸Sakini, navong nihi ulmatu ka hiluk hoh, konalokoveintei nau li, Ahi. Kitos hetal minau navong nihitehiten usil keihoen ka hetetamenien onom min titiali keil koa amul, ka min koakeil il imai veah ikatau.

¹⁹Ahi, sakien keil ten maluen onom marite vis marite mok. Komumon marmari tounah keil ka tovuol vasuvaluk.

²⁰Avaseini komaenau navisu en avong takeih ka sakvisien keil, katau eni, kisan ris keihoen minau. Munak namesai vesesal mamat, ka korali lat ris nau ran matien.

²¹Kisan ris hetetamenien minau heli koa nakuri mulamu. Kisuv lat ris rendemien onak.

²²Nisau masmasuk hetal min kitar onak. O Ahi onak, nimasmasuk veni komusil kat hatkatien keil onom lises. Anatin, hetal min iukalele onak, nisau en souen keil heha minuk, Ahi onen me-Isrel keil, kovi votut imok.