Psalms 19:1-13

¹(David ko wur) Taiti gomang kualala aniso mu Kaem ko ningo nanga kasurso; melmasak taiti gomang te mu Kaem ko kiwol wetang te saposo.

²Kowarkalal suan suan mu mel imi suen la ko nanga kasuruwoso; tirom suan suan karogotala ko nanga kasuruwoso.

³Kowarkalal se tirom nungumik nuguring mena, se mel imi ko balmon se me ikinakkowo.

⁴Bare nunga nuguring ali lilim te geraga saparam; nunga den mu sor suen la te geragam. Taiti gomang te Kaem worem ko kawam bo kaolam.

⁵Worem turomola basu arataso mu kari bo imet iru tam ale ko amilmil te ko kawam beteso ale arataso iwita; agi kari bo kolara nagura imi ko nagurokko numi nungurso burangoso iwita.

⁶Worem taiti duap koma sang te duap beteso ale nama koma sang te kaposo; mel bo ta noko kowar ko yumurokko yam me terong, mena.

⁷Kaem ko munan den mu yam dirkiriyam, se marak iru nangarso; noko den balam mu ana te ira sanamanakko, se awiriya ikia ko tukunangaso wore ikia tuso.

⁸Kari Biya ko den mu munan ningo nangarso, se awiriya karo tuso mu amilmiloso; noko den gilalong mu yawarakala nunguning se nikinang ningo nangarso.

⁹Awiriya Yawe ko kua kaposo mu kilek ningo beteso, se kilek umu pempem ani lagarukko; den nu balso mu ningo la, se diram nunguningkiri.

¹⁰Kaem ko den mu mel ningo ningo suen biya nunga kia saparam, ali imi ko mel duap duap mu yam nunga kia saparam nunguningkiri; buta se den imi mu ana nangamang ninguru tunakko.

¹¹Yawe, nika den mu ani nika ura kari ikia ningo aisiso; ani nika den karo tusam mu te ni aninga daiga bagara ningo aisisam.

¹²Bare awiri kota ko memek suen la ko iki saposo? Mena. Buta se ani munan memek sang beterem wore me ko ikiem agi, angamili saparam agi mu, ni siwu aisuko.

¹³Ale aga sangaru se memek ko iki se wore am ngual me bitirikko; aga sangaru se munan memek mu me aga bituokko; uwuta aga bitar mu ani ni kema te memek biya bo mena, ningo la bagarikko.