Yabura 19:1-13

¹Dawuda xa bɛɛti bɛɛtibae xa mangɛ bɛ

²Koore Ala xa nɔrɛ masenma. Koore walaxɛ Ala xa wali masenma.

³Yanyi lɔnni masenma lɔxɔ yo lɔxɔ. Dimi xaxili masenma kɔɛ yo kɔɛ.

⁴Xui yati yati mu a ra, wɔyɛnyi fan mu a ra. Tuli mu nɔma e xui mɛde.

⁵E fɔxi toma duniɲa birin ma. E fɔxi yire makuye birin lima, han soge sa sama kankira naxan kui.

⁶Soge minima nɛ alɔ xɛmɛ naxan baxi ginɛ dɔxɔde, a fa mini a xa konkoe kui, alɔ mixi xungbe naxan ɲɛrɛma a yɛtɛ xa kira xɔn.

⁷A ɲɛrɛ fɔlɔma sogetede, a sa ɲɔn sogegorode. Sese mu nɔma a wuyenyi bade.

⁸Alatala xa sɛriyɛ, sɛriyɛ fanyi na a ra. A sɛnbɛ fima mixi ma. Alatala xa nɔndi, nɔndi yati na a ra. A lɔnnitare findima lɔnnila ra.

⁹Alatala xa nɔɛ, nɔɛ tinxinxi na a ra. A mixi bɔɲɛ raɲɛlɛxinma nɛ. Alatala xa masenyi, masenyi tinsexi na a ra. A mixi xaxili ya rabima nɛ.

¹⁰Alatala xa yaragaaxui, fe sɛniyɛnxi na a ra. A mu ɲɔnma abadan. Alatala xa yaamari, yaamari fanyi na a ra. A birin tinxin.

¹¹Ala xa yaamari, a fan xɛɛma bɛ, a fan dangi xɛɛma fanyi birin na. Ala xa yaamari, a ɲɔxun kumi bɛ, a ɲɔxun dangi kumi fanyi birin na.

¹²I xa konyi xaxili sɔtɔma nɛ i xa sɛriyɛ kui. A geeni gbegbe toma nɛ naa.

¹³Nde nɔma a yɛtɛ kan yuge ɲaaxie birin kolonde? I xa n ma yunubi nɔxunxi xafari n mu naxan kolon.