Sam keil 19:1-13

¹Asuv houlu Deved mutisi Hitu keil en out nesa amul arie lat muohien ten hetetamenien onen Ahi, ka teilang emun mul vothot en tounah koa kei mumoni.

²Navong meteiai mea roha, mul eris vit usil keihoen onen Ahi va vio … mea ris out mulan; ka avati emun mules vitehiten ileilien onen Ahi Asuv va vio … mea ris.

³Koakeil enek arselustei, ka rea tovuol rovataengoni en keil;

⁴ka mukos, longlongien keil one usil Ahi karahit out vasi; va rokol meatin vasi keil en out netan. Meteiai en out nesa, Ahi lingi en vulie.

⁵En visokon vasi, mea ral min sien; kei suval meatin koa tin si ka sak mesei ven lohlohien tai.

⁶Mea en usite ten teilang ka muloh va en usite sav. Kei sakin out vasi mutin, tounah tovuol vato suai eni.

⁷Mengkatien onen Ahi Asuv tahos imok, ka sak revi tiner. Hatkatien onen, rokilea rovaling desien orer eni; ka mul san meteisauen min koakeil one tovuol.

⁸Mengkatien keil onen Iahova mal vasi, ka koakeil along kati, isi keil. Ren Ahi, rolonge rolong kilea, ka san ileilien min ir vasi.

⁹Kei mal keke rorie lat houhouen orer min Ahi, rehoumoni lisenges. Mengkatien keil koa sani min ir avi anatin; keil amal vasi.

¹⁰Keil atahos imok lohlin tounah vasi keil ten out netan, ka kasien teni mulin kasien ten hani.

¹¹Keil aviseinau, meatin toumien onom, en sakien keil koa tahos. Ka koakeil amum usili, akur uite koa tahos imok.

¹²Avaseini koanek anatin, komai mesakras mevalei vasin tisaen keil onomai. Sakini, Ahi Asuv, munak namumon tounah tatisa tai nareingeingeni, kilah lati li ranau.

¹³Ka tisaen keil koa namundem maenis namumoni, kiting koe inau li nanamottei mun eni. Konamaentei tisaen keil enek analamunau en sise koa romaltei. Hesakini, moulien onak kilea vatolas, ka nimaluv ran keihoen ten tisaen.