Kölfel 19:1-13

¹Ngeni ewe mi emweni chon köl: Echö än Tafit köl. Ekewe läng ra pwärätä lingen Kot, nge fän läng a arongafeili usun angangen pöün.

²Rän a kapas ngeni pwal eu rän usun, nge pwin a asile ngeni pwal eu pwin usun.

³Esap wor ar fos, esap pwal wor ar kapas, esap wor eman a tongeni rong mwelier.

⁴Nge mwelier a chöfetal lemenen unusen fanüfan, ar kapas a tori lesopun fanüfan. Kot a föri eu imw fän läng fän iten akkar.

⁵Akkar a tötä usun eman mwän apwüpwülü söfö a towu seni lon rumwan, a pwal sä won alan usun eman mwän mi pöchökül a pwapwa lon an kitir.

⁶Akkar a tötä seni epek läng o fetal ngeni ewe epek, nge esap wor och mettoch a tongeni op seni pwichikaran.

⁷Än ewe Samol mi Lapalap allük a fokun mürina, a apöchökülasefäli letipach. Än ewe Samol mi Lapalap kait a let, a atipachema ir mi wewemang.

⁸Än ewe Samol mi Lapalap öüröür ra pwüng, ra apwapwai lelukach. Än ewe Samol mi Lapalap kewe allük ra fat, ra awora mirit.

⁹Ach niuokusiti ewe Samol mi Lapalap a mürina, epwe nonom tori feilfeilachök. Än ewe Samol mi Lapalap pwüüng ra let, ir meinisin ra pwüng.

¹⁰Ra aüchea lap seni kolt, ewer, lap seni chomong kolt mi mürina. Ra pwal arar seni chönün chunen, pwal seni sürün ewe fasen chunen.

¹¹Ren ekei allük ngang noum chon angang üa angei ai fön seniir. Eman mi apwönüetä epwe angei liwinin mi lapalap.

¹²Nge iö a tongeni mefi iteiten an föför mi mwäl? Kopwe amusa seniei ekewe tipis mi monomon.

¹³Kopwe pwal tümwünüei pwe ngang noum chon angang üsap föri tipis ren mochenin letipei. Kosap mwüt ngeniir pwe repwe nemeniei. Mürin üpwe unusöch lon manauei o ngas seni pupungau mi watte.