Psalmaro 75:1-9

¹Al la ĥorestro. Por Al-taŝĥet. Psalmo de Asaf. Kanto. Ni gloras Vin, ho Dio, ni gloras Vin; Proksima estas Via nomo; Oni rakontas Viajn miraklojn.

²Kiam Mi elektos tempon, Mi faros justan juĝon.

³Tremas la tero kaj ĉiuj ĝiaj loĝantoj; Mi fortikigis ĝiajn kolonojn. Sela.

⁴Mi diras al la fanfaronuloj: Ne fanfaronu; Kaj al la malvirtuloj: Ne levu kornon;

⁵Ne levu supren vian kornon, Ne parolu kun nefleksebla kolo;

⁶Ĉar ne de oriento kaj ne de okcidento Kaj ne de la dezerto venas alteco.

⁷Nur Dio estas juĝanto; Unu homon Li malaltigas, kaj alian Li altigas.

⁸Ĉar la pokalo estas en la mano de la Eternulo, Kaj la vino ŝaŭmas, plena de aromaĵo, kaj Li verŝas el ĝi; Sed nur ĝian feĉon elsuĉos kaj trinkos ĉiuj malvirtuloj de la tero.

⁹Kaj mi eterne predikos, Mi kantos al la Dio de Jakob.