Pisalem 75:1-9

¹Meenei God, gimaadou e hai danggee adu gi di Goe, gimaadou e danggee adu gi di Goe! Gimaadou e hagadele di hai o do aamua mo di hagadele au hegau haga goboina ala ne hai.

²God e helekai, “Au gu haganoho dagu madagoaa belee hai dagu gabunga, gei Au gaa hai dagu gabunga gi di hai dela e donu.

³Ma e aha maa nia mee huogodoo i henuailala ga bolebole, mo henuailala hagatau ga ngalungalua, gei Au gaa hai di hagamau o henuailala gi mau dangihi.

⁴Au e helekai gi digau huaidu bolo ginaadou gi hudee hagamuamua.

⁵Au e helekai gi digaula bolo gi dugua nadau helehelekai hagapuu.”

⁶Di gabunga la hagalee haneiha i dua, be e hanaga i dai, be mai ngeia be mai ngaaga.

⁷Ma go God dela go tangada hai gabunga, gei i baahi o God hunu gau e hagi aga e dadaaligi, gei hunu gau e hagamehede.

⁸Dimaadua e daahi dana ibu i lodo dono lima, guu honu nia waini maaloo o dono hagawelewele. Mee gaa llingi nia maa gi digau huaidu huogodoo gi inumia, digaula ga inu nia maa gii odi.

⁹Gei au hagalee loo e noho dagu helehelekai i di hai o di God a Jacob, be e noho di dadaahili gi Mee e hagahagaamu a Mee.