SAM 75:1-9

¹Anutu, ninda gae gaak kaknga akganikamang. Akganike umanda asinggan yatangenakamang. Yatangenake gatane umanda kopsa akngae yakapmakamang. Aminbamda sanga inata inata take siknga gata pasikuyakge yakaing.

²Anututa anzing yakut, “Nata wam yaningge tapduk gwenu gwa yawa yukut. Sike nata wa usanziwiu noman gan. Gutonga dua siwik,” ngang yakut.

³Siwan anzing yakut, “Kepdakata saasitakuwan aminu une yuaingga tanggaganuwa kekeknga yuwik.

⁴Nata yamandotdong aminu anzing yaninggat, ‘Ginu yamandeu ma siwam.’ Sike gatu wai aminu anzing yaninggat, ‘Ginda gisane umanza ma yapangenawam.

⁵Ginu gisane kekeknga akngasae ma bakngawam. Siwan ma yanggamatake na sapdut wamu ma naniwam.’”

⁶Sike aminu tapatutane umana takekopnanga aminu tapatu gunzitda akonggak katang ba gunzitda pukunggak katang ba amunggwak ba aigwak ngangu wena.

⁷Anutu awiapatakan nindane yuyuknginu usanzikgak. Itanu aminu tapatutane umana atakepuke tapatutane umana atakekonggak.

⁸Sike Buyambam tapata kau gomdu wainu toknga aknga tukngwamban dopan takut. Ita yangga waaknga wai aminu kuupbamde tukngwayaman tangopa puyuwik. Ina unzakan wai aminu Anutue kaine siknga wamu yaning ngana, gatukande siknga wena sining.

⁹Siwan ngana nata Jekopdane Anutunae umana asinggan yakapit. Yakapmake nata kau kumzang taike umana buyambam siknga yatangenawit.