Psalmaro 73:1-28

¹Psalmo de Asaf. Jes, bona estas Dio por Izrael, Por tiuj, kiuj havas puran koron.

²Sed mi — apenaŭ ne falŝanceliĝis miaj piedoj, Preskaŭ elglitis miaj paŝoj.

³Ĉar mi ĉagreniĝis pro la fanfaronuloj, Vidante la bonstaton de la malvirtuloj.

⁴Ĉar ili ne havas suferojn de morto, Kaj iliaj fortoj estas fortikaj.

⁵Ili ne partoprenas en la zorgoj de homoj, Kaj ili ne suferas kun aliaj homoj.

⁶Tial ilian kolon ĉirkaŭvolvis fiereco, Kaj perforteco ilin vestas kiel ornamo.

⁷Pro graso elmetiĝis iliaj okuloj, Superbordiĝis en ilia koro la intencoj.

⁸Ili mokas, ili parolas malbonintence pri premado; Ili parolas de alte.

⁹Kontraŭ la ĉielon ili levas sian buŝon, Kaj ilia lango promenas sur la tero.

¹⁰Tial tien ankaŭ iras Lia popolo, Kaj ili akvon ĉerpas abunde.

¹¹Kaj ili diras: Kiel Dio scias? Kaj ĉu la Plejaltulo komprenas?

¹²Jen tiuj estas malvirtuloj, Kaj ili estas feliĉuloj de la mondo kaj atingis riĉecon!

¹³Nur vane mi purigis mian koron Kaj lavis per senkulpeco miajn manojn,

¹⁴Kaj mi turmentiĝas ĉiutage Kaj mi suferas punon ĉiumatene!

¹⁵Se mi intencus paroli kiel ili, Tiam mi fariĝus perfida al la generacio de Viaj filoj.

¹⁶Mi meditis, por kompreni ĉi tion; Sed ĝi estis malfacila en miaj okuloj,

¹⁷Ĝis mi venis en la sanktejon de Dio Kaj ekkomprenis la finon de tio.

¹⁸Vi starigas ilin sur glitiga loko; Kaj Vi ĵetas ilin en pereon.

¹⁹Kiel momente ili ruiniĝis! Pereis, malaperis de subita teruro!

²⁰Simile al sonĝo post la vekiĝo, Vi, ho mia Sinjoro, en kolero tute sensignifigas ilian bildon.

²¹Kiam bolis mia koro Kaj turmentiĝis mia internaĵo,

²²Tiam mi estis senklerulo kaj mi ne komprenis; Mi estis kiel bruto antaŭ Vi.

²³Sed mi ĉiam estas apud Vi; Vi tenas min je la dekstra mano.

²⁴Per Via konsilo Vi min kondukas, Kaj poste Vi akceptas min kun honoro.

²⁵Kiu estas por mi en la ĉielo? Kaj krom Vi mi nenion volas sur la tero.

²⁶Konsumiĝas mia karno kaj mia koro; Sed la fortikaĵo de mia koro kaj mia parto estas Dio por eterne.

²⁷Jen tiuj, kiuj malproksimiĝas de Vi, pereas; Vi ekstermas ĉiun, kiu perfidiĝis al Vi.

²⁸Sed al mi estas bone, ke mi estas proksima al Dio; Sur mian Sinjoron, sur la Eternulon, mi metis mian fidon, Por rakonti ĉiujn Viajn farojn.