Tingtoeng 73:1-28

¹Asaph kah Tingtoenglung Thinko aka caih Israel taengah Pathen tah then taktak.

²Tedae kai tah ka kho he bet bung khaw bung bangla, ka khokan paloe khaw paloe pawt bangla ka om.

³Halang rhoek loh ngaimongnah neh a thangthen uh te ka hmuh vaengah ka thatlai coeng.

⁴Anmih tah dueknah dongah thuengthuelnah om pawt tih, a pumtak khaw len.

⁵hlanghing kah thakthaenah loh amih te nan pawt tih hlanghing taengkah lucik khaw ya uh pawh.

⁶Te dongah hoemnah te amih kah oihnun la om tih, a kuthlahnah hnisui a khuk uh.

⁷A mik tha te coe tih, a thinko ngaihlihnah loh vikvuek uh.

⁸Boethae neh palawm uh tih cal uh. Hnaemtaeknah a sang la cal uh.

⁹A ka te vaan ah a tael dae a lai loh diklai ah cet.

¹⁰Te dongah a pilnam loh hela ha mael ha mael tih khuengrhueng tui a yawn uh.

¹¹Te vaengah, “Pathen loh metlam a ming tih, Khohni taengah lungming khaw om van nim,” a ti uh.

¹²Amih halang rhoek pataeng kumhal ah a khuehtawn loh thayoeituipan la a rhoeng pah daeta ke.

¹³A poeyoek la ka thinko ka saelh tih, cimnah neh ka kut ka silh dae.

¹⁴Tedae hnin takuem lucik neh ka om tih mincang takuem ah kai taengah toelthamnah ha om.

¹⁵Te tlam te ka tae koinih na ca rhoek kah thawnpuei te kan hnukpoh tak ve ka ti.

¹⁶Hekah he ming ham ka moeh dae ka mik ah thakthaenah la om.

¹⁷Pathen kah rhokso khuila ka kun daengah amih kah hmailong te ka yakming.

¹⁸Amih te long hnal ah na khueh tih pocinah la na cungku sak taktak.

¹⁹Mikhaptok ah mueirhih loh imsuep neh a thup uh tih a cing te metlam a om uh.

²⁰Haenghang hnukah mueimang bangla ka Boeipa loh amih kah mueihlip a haenghang vaengah hnael pah.

²¹Ka thinko loh khikhi hal tih ka hmuet a phawt vaengah.

²²Kai loh ka kotalh tih na hmaiah rhamsa bangla ka om khaw ka ming pawh.

²³Tedae kai tah nang taengah ka om taitu tih ka bantang kut nan tuuk.

²⁴Na cilsuep neh kai nan mawt tih thangpomnah hnukah kai nan khoem ni.

²⁵Vaan dongah kai ham unim aka om. Tedae namah taengah ka om atah diklai ah ba khaw ka ngaih pawh.

²⁶Ka pumsa neh ka thinko loh yawk mai suidae kumhal ah ka thinko kah lungpang neh ka hamsum la Pathen om.

²⁷Namah lamkah a hlahloei loh a milh uh vaengah, nang taengah aka cukhalh boeih te na biit taktak coeng he.

²⁸Tedae kai loh kamah ham Pathen vang te ka kai. Na bitat cungkuem thui hamla ka hlipyingnah ka Boeipa Yahovah taengah a then ka khueh.