Salmo 73:1-28

¹Meupiya iyan is Megbevayà te Israel, lavew en diyà te menge etew he lumpiyu is gehinawa zan.

²Piru siak, hapit en egkaawà is kedtuu ku,

³su nesina a te gelbuwen wey lalung he menge etew hein neehè ku he mid-uswag sikandan.

⁴Meupiya is kedlelawa zan ne kenà mesakit is kemetayen dan.

⁵Wazà menge elentusen dan ne kenà sikandan edlised iring te zuma he menge etew.

⁶Umbe, melemu zà diyà te kandan is kebpaahà te kegkegelbuwen dan wey kegkemesipala zan.

⁷Is menge ǥehinawa zan nepenù en te kelelalung, ne iyan dan dà layun egkeisip is kebaal te mezaat.

⁸Edsudien dan wey mezaat is ebpengeǥiyen dan diyà te zuma. Utew sikandan hembugiru he ebpenhulgà wey ebpendaagdaag te zuma.

⁹Mezaat is menge lalag dan he igkuntada zan te Megbevayà diyà te langit wey te menge etew kayi te kelibutan.

¹⁰Umbe, minsan is menge etew te Megbevayà edsunud kandan wey ebpengumbenar te egkeǥiyen dan.

¹¹Ke sikandan te, “Kenà egkesayud is Megbevayà? Wazà hanew te Utew Lavew he Megbevayà.”

¹²Iring keniyan is menge lalung he etew, wazè dan igkeliveǥ ne mid-iseg pa is kegkesepian dan.

¹³Tenged kayi wazè ku maahà is pulus te kedtinazeng ku wey kedlikey ku te salà.

¹⁴Layun a kenikew ibpaantus, Megbevayè ku; hapit kada meselem is kedsiluti nu kedì.

¹⁵Angin ke mid-iringan ku is lalung he menge etew te ked-un-undaha zan kenikew, ne nelimbungan ku en is menge etew nu.

¹⁶Nenigudu a wey ku mesavut heini, piru utew a midlised,

¹⁷taman te midhendiyà a te valey nu, ne zutun nesavut ku human ke hengkey is egkehitavù diyà te lalung he menge etew.

¹⁸Benar he idsavuk nu sikandan diyà te wazà kesiguruwan he kebpekesavuk, ne edezeetan nu sikandan.

¹⁹Egketik-ew zà sikandan egkengezeeti; egkeumahan sikandan te mekahandekhandek he hitavù ne ebpematey sikandan is langun.

²⁰Is kegkahanew zan iring te teǥeinep he emun edkepukew ki is nekelipezeng ne wazè en. Egkelipatan en sikandan emun egkesilutan nu en sikandan.

²¹Hein neseeng a wey nesekitan a,

²²nehimu a he iring te tulebung he langgam diyà te etuvangan nu su wazè ku sikew mesavut.

²³Piru ed-uvey a ǥihapun diyà te kenikew ne egiyahan a kenikew.

²⁴Egiyahan a kenikew pinaaǥi te menge sambag nu, ne ziyà te egkehuziyanan ed-uwiten a kenikew ziyà te utew meupiya he kebpekesavuk.

²⁵Wazè en duma ziyà te langit he egkinehenglanen ku, kekenà, iyan ke zà. Su ǥeina te kayi ka te kediey, wazè en duma pa he ebpengenduyen ku kayi te kelibutan.

²⁶Minsan edluyahan is lawa ku wey isip ku, iyan ka, Megbevayè ku, ebpuunan te zesen ku. Iyan ke zà egkinehenglanen ku taman te taman.

²⁷Is menge etew he ed-iniyug kenikew, ne kenà duwazuwa he egkengahanew sikandan; edezeetan nu is wazà medtuman te egkesuatan nu.

²⁸Piru mid-isip ku mulà he utew meupiya is ked-uvey ziyà te kenikew, Megbevayà. Nengazen he MEGBEVAYÀ, midhimu ku sikew he kutè ku, su wey ku ikeseysey is langun he menge vaal nu.