SALMOS 73:1-28

¹Toteco Dios nelía cuali iyolo ica israelitame. Quena, quinicnelía nochi tlen quipiyaj tlapajpactic ininyolo.

²San quentzi polihuiyaya para nihuetztosquía. Noicxihua xitlaniyaya huan nechcatitoya para nimomimilos tlatepexico.

³Queja nopa nielqui pampa ax niquijiyohui para ax niquixtocas quema niquitac quejatza tlapijpiyayayaj nopa tlacame tlen mohueyimatij huan tlen tlaixpanoj.

⁴Itztoque cuali ipan nochi ininyolis, huan ax mococohuaj.

⁵Ax quinajsi tlaohuijcayotl niyon cuesoli, queja sequinoc quipiyaj.

⁶Yeca quema mohueyimatij, quiitaj para yejyectzi queja se costli tlen tlachijchihuali ica piltetzitzi tlen pajpatiyo. Huan quema quichihuaj tlen ax cuali, quiitaj queja ininyoyo tlen yejyectzi.

⁷Nopa tlaixpanoca tlacame ya quijquisaj iniixtiyol pampa tlahuel motomajtoque, huan ya quipixtoque nochi tlen ininyolo quinequij.

⁸Inijuanti san quihuetzquilíaj Toteco huan quintemajmajtíaj itlacajhua. Mohueyimatij quema camatij.

⁹Fiero quitlaijilhuíaj Toteco Dios tlen itztoc ipan elhuicactli. Huan quintelchihuaj tlen itztoque ipan ni tlaltepactli.

¹⁰Yeca Toteco Dios quinhualicas sampa nochi itlacajhua ipan ni inialtepe, huan quipiyase miyac atl nochi inijuanti.

¹¹Huan quiijtose: “¿Toteco nelía quimatis tlachque pano? ¿Yajaya Tlen Más Hueyi nelía quichihuilía cuenta tlen pano nica?”

¹²Xiquitaca, ni tlacame tlen ax tleno quineltocaj ax tleno ininpati. Quipiyaj se yejyectzi yolistli huan ajachica quimiyaquilíaj más inintomi.

¹³¡Ax tleno nechpalehuía para nijpiya noyolo tlapajpactic, huan san tlapic nimocuatotonía para ax nijchihuas tlajtlacoli!

¹⁴Pampa nochi se tonal nechtlatzacuiltíaj huan nechtlaijiyohuiltíaj sesen ijnaloc.

¹⁵Intla nicamatitosquía queja inijuanti, huajca niquincajcayajtosquía nochi motlacajhua.

¹⁶Quema nijnejqui nijmachili para tlen itztoque cuali nopa tlacame tlen quicocolíaj Toteco, elqui tlahuel ohui para nijmachilis.

¹⁷Pero se tonal nicalajqui ipan motiopa, Toteco Dios, para nimoyolilhuis tlen nopa tlamantli, huan huajca nijmachili tlachque quinchiya.

¹⁸Tiquintlalijtoc ipan se ojtli tlen tlahuel alaxtic. Quema tiquincuatopehuas, huajca nimantzi huetzise ipan se hueyi tlacoyoctli huan nopano nenpolihuise.

¹⁹Quena, ica se tlalochtli tlamis nochi ininpaquilis. Huan itztose ipan majmajtli para nochipa.

²⁰¡Nochi ininyolis eltoc queja se temictli! Quena, queja quema se cochtoc huan isatiquisas, Toteco, queja nopa quema timotlalanas huan tiquinhuejcamajcahuas.

²¹Quema niquitac ya ni, nelía tlahuel nicualanqui huan hasta nechcocohuayaya noyolo.

²²Pampa niquitac para tlahuel nihuihuitic nieltoya. ¡Hasta ninesiyaya moixpa queja se nitlapiyali tlen ax quipiya itlalnamiquilis!

²³Pero yonque ya ni nopantic, nochipa niitztoc mohuaya ta, Toteco, huan tinechitzquitoc ipan noma nejmatl.

²⁴Huan nijmati para motlamachtil quisenhuiquilis nechyacanas ipan nochi noyolis. Huan teipa, quema nimiquis, tinechselis nepa mochaj campa tlayejyectzi.

²⁵Axaca seyoc nijpiya nepa elhuicac. ¡San ta, tinoTeco Dios! ¡Huan san ta nimitznequi ipan ni tlaltepactli huan axaca más!

²⁶Quemantzi nimococohua huan nimocuesohua. ¡Pero Toteco Dios yajaya mocahua para nochipa! Yajaya quifuerzajmaca noyolo huan san yajaya noaxca para nochipa.

²⁷Pero Toteco quintzontlamiltis nochi tlen ax quinequij quihueyichihuase. Quena, yajaya quintzontlamiltía nochi tlen quitlahuelcahuaj.

²⁸Pero na achi más nimonechcahuis campa Toteco Dios, pampa ya nopa tlen más cuali para na. San ipan TOTECO nimotemachijtoc pampa yajaya noTeco. Huan niquinpohuilis nochi tlacame nochi nopa yejyectzi tlamantli tlen yajaya nechchihuilía.