Hozea 8

1

2

3

4

5

6

7

8

9

10

11

12

13

14

¹Veko la nia sa buki pa berumu! Keke atata si pa kali sage koasa butubutu Izireli te Zihova sina sari tie si seke ia rini sa Qua vinariva egoi meke lopu luli rini sari Qua tinarae.

²Kabo vura se Izireli koa Rau, ‘Kei Tamasa, na mami Tamasa tugo si Agoi’

³Ba se Izireli si ele kilu ia sapu leana; gua ke keke kana kote hadu luli ia si asa.

⁴Va turu dia baṉara pa dia hiniva soti lopu Taqarau; vizata dia koimata ba lopu pa Qua vina malumu. Koari dia siliva na qolo si tavete dia beku si arini meke va kamo nia dia tinahuara teledia.

⁵Kei Sameria, gona vura nia sa mua beku bulumakao! Sa Qua binugoro si guana nika la koa rini. Vea seunae gua si kote koa boni eko mo si arini?

⁶Na mae guadi pa Izireli! Sa tuna bulumakao hie sapu na tie peqopeqo tavetia si lopu na Tamasa. Kote ta moku umumu mo si asa, sa tuna bulumakao tadi pa Sameria sana.

⁷Lete ia rini sa givusu meke paketia rini sa vivirua. Sa qaqaloto si koa ba loke kikona; ke loke palava si kote va gavoria sa. Pana va vura huiti sa, ba ari tie karovodi na kote onolo pania.

⁸Ta onolo taloa se Izireli; kamahire si koa turaṉa votiki butubutu si asa guana keke tiṉitoṉa sapu loke laena.

⁹Ura ele ene seu latu pa Asiria si arini guana doṉ'ki pinomo sapu ene ekena. Ele holuholu pule nia se Iparemi la koari nana babaere.

¹⁰Na ele holuholu puleni tu koari kaiqa butubutu, ba kote varigara puleni Arau. Kote podalae matemate palae si arini pa kauruna sa vina kilasa tanisa keke baṉara ṉiṉirana.

¹¹Taveti tugo Iparemi sari soku hope tana va vulasa sinea, ba ta evaṉae na hope tana tavete va sea mo si arini.

¹²Kubere poni Rau sari soku ginugua koari Qua tinarae, ba guni ni arini na tiṉitoṉa karovodi tu.

¹³Va vukivukihi mae si arini koa Rau meke henai rini sari masa, ba lopu qetu ni Arau Zihova si arini. Kamahire kote balabala pulei Rau sari dia kinaleana meke va kilasi koari dia sinea: Kote pule la mo si arini pa Izipi.

¹⁴Ele muliṉi nia Izireli si Asa pu va podakana, meke kuri dia vetu baṉara; meke gobai Ziuda sari soku nana vasileana. Ba kote garunu gore la nia Arau sa nika koari dia vasileana lavata sapu kote sulu pani sari dia vasileana ta gobadi.”