Annabi Hose 8

1

2

3

4

5

6

7

8

9

10

11

12

13

14

¹«Wo xa gere sara fe! Yaxui goroma nɛ Alatala xa banxi ma alɔ sɛgɛ, barima ɲama bara n ma laayidi kana, e naxa muruta n ma sɛriyɛ ma.

²E n xilima, ‹Muxu Marigi Ala, muxu i kolon, muxu tan, Isirayila.›

³Isirayila to bara fe fanyi bɛɲin, yaxui birama nɛ a fɔxɔ ra.

⁴E bara mangɛe ti n ma yaamari mu naxan na, e bara kuntigie ti e mu n maxɔrin. E bara kuyee rafala e xa gbeti nun xɛɛma ra. Nee halakima na nan ma.

⁵Samarikae, wo wo xa ninge kuye wɔlɛ. N bara xɔnɔ wo ma a ɲaaxi ra. Wo wo yɛtɛ manɔxɔma yi fe mɔɔli ra han mun tɛmui?

⁶Yi kuye fatanxi wo tan Isirayila nan na. Mixi nde nan a rafalaxi, Ala mu a ra! Samari xa ninge kuye fama nɛ butuxunde.

⁷Naxan ɲɛrɛma fe ɲaaxi kui, gbaloe fama nɛ a lide. Hali mɛngi tɔnsɔɛ keren, e mu a sɔtɔma xɛ ma. Sansi naxan bulama, a mu findima baloe ra. Hali nde findi a ra, si gbɛtɛ nan a donma.

⁸E bara Isirayila xun nakana, e e xanin ɲamanɛ konyiya kui.

⁹Isirayilakae bara siga Asiriya bɔxi ma, alɔ sofale naxan luma a keren.

¹⁰Hali e mixi naxee saraxi sie tagi e kantafe ma, n e birin malanma nɛ, alako e xa tɔɔrɔ mangɛe xa kote bun ma.

¹¹Efirami bara sɛrɛxɛbadee rawuya alako e xa yunubie xa xafari, kɔnɔ na sɛrɛxɛbadee bara a niya e xa yunubie sɔtɔ.

¹²N bara n ma sɛriyɛe birin sɛbɛ, e xa na kolon, kɔnɔ e mu tide toxi a ma.

¹³E sɛrɛxɛe bama n bɛ, e na sube don, kɔnɔ na mu rafan Alatala ma. Yakɔsi, Alatala fama nɛ e ɲaxankatade e xa yunubie xa fe ra, e xa gbilen Misira bɔxi ma.

¹⁴Isirayila bara nɛɛmu Ala ma, naxan e daaxi. E na mangɛ banxie tife. Yudaya fan na taae tife, naxee sɛnbɛ gbo, kɔnɔ n na birin ganma nɛ tɛ ra.»