1Kei Izireli, mi noso koari mia qinetuqetu; mi lopu qetuqetu koari na inevaṉa gugua ari na butubutu huporo. Ura ele sekea gamu sa vinariva egoi koasa mia Tamasa; okoro nia gamu sa tinabara tana maqota koari na vasina paqapaqahana huiti.
2Koari na vasina ta paqaha sari na kiko huiti koari na qaqalotodi si lopu kote vagi ni ginani ri na tie, meke koari na vasina munala vagi kolo qurepi si lopu kote ta vagi sari dia vaeni vaqura.
3Lopu kote koa hola si arini pa popoa te Zihova; se Iparemi si kote pule la pa Izipi meke kote la hena ginani bonidi pa Asiria.
4Lopu kote variponi vaeni la koe Zihova si arini, sari dia vinukivukihi ba lopu kote qetu ni Sa. Kote guana bereti tadi pa haqohaqoana sari vinukivukihi arini; doduru pu hena i si kote boni beto mo. Kote teledia mo hena ia; lopu kote variponi nia rini pa Zelepade te Zihova.
5Koari mia rane ta vizatadi pude inevaṉa si nasa si kote tavetia gamu, koari na rane inevaṉa te Zihova?
6Be govete nia gamu sa tinahuara, ba kote varigara ni mo e Izipi, meke Memipisi kote pomununi gamu. Sari mia tinagotago pa siliva si kote vagi hobei na hilibubuku, meke na hiqohiqo rakihi kote siṉi sari mia ipi.
7Sari na rane vina lipulipu si korapa mae, sari rane pude variva kilasi si ele kamo. Mani tumae nia Izireli si hie. Koa gua sapu soku hola sari mia sinea meke mia kinukiti koe Zihova si noma hola, si balabala ia gamu sapu sari poropita meke sarini pu ta garunudi pa Maqomaqo te Tamasa si guana tie pekipekidi.
8Sa poropita meke sa qua Tamasa, si na tie kopu pa Iparemi, ba na sipata aqa nia si asa koari doduru nana siraṉa, meke pa Zelepade te Zihova tugo ba kana ia rina tinoni sa poropita.
9Ele lodu lohi la sa dia kinaleana, gugua koari na rane pa Qibea. Kote balabala pule vagi Tamasa sari dia kinaleana meke va kilasi koari dia sinea.
10Zama se Zihova, “Totoso dogoro vagia Rau se Izireli, si guana hata vua qurepi pa qega; totoso dogori Rau sari tiatamamia, si guana totoso ta dogoro sari vua kekenu pa huda piqi. Ba sipu kamo la rini pa toqere Peoro vasina tavahesi se Beolo, si poni puleni koasa beku variva kurekurena asa meke variva malederedi gua tugo sa tiṉitoṉa sapu vahesia rini.
11Sa tinolava te Izireli si kote tapuru taloa guana kurukuru, lopu kote gavoro pa tia, lopu kote molu, lopu kote podopodo.
12Be guana podo koburu si arini, ba kote mate pani Arau sari doduru. Madi talotaṉa si arini pana taliri taloa si Arau koa rini!
13Ele dogoria Rau se Iparemi, leleana gua pa Taea, ta lete pa vasina leleana. Ba kote turaṉa vurani Iparemi sari nana koburu pude tava mate.”
14Ego Zihova, poni lani, na sa kote poni lani Goi? Poni ni kokoana koburu sapu huara molu meke sari susu sapu loketoṉana.
15Zama se Zihova, “Koa gua koari doduru kinaleana sapu taveti rini pa Qiliqali, si kana i Rau si arini vasina. Koa gua koa ri na dia tinavete kaleadi, ke kote hadu vura ni Arau koasa Qua popoa Izireli. Lopu kote tataru pule ni Arau; doduru dia koimata si seke tinarae beto.
16Se Iparemi si ta seke gore, sari karoso dia si harahara, lopu vua si arini. Be podo koburu ta tataruedi rini ba kote va mate i Arau.”
17Sa qua Tamasa kote kilu i si arini sina lopu va tabe ia rini si Asa; kote ene la mae si arini koari na butubutu huporo.
