Annabi Hose 9

1

2

3

4

5

6

7

8

9

10

11

12

13

14

¹Isirayila, i naxa ɲɛlɛxin, i naxa sɛɛwa alɔ si gbɛtɛe. I to i Marigi Ala bɛɲin, i bara findi langoe ra. Langoe masundi bara rafan i ma, i naxan sɔtɔma lonyi yire.

²Wo mu baloe sɔtɔma lonyi yire, wo mu wɛni sɔtɔma wɛni bogi bundu se kui.

³E mu luma Alatala xa bɔxi ma, Efirami gbilenma nɛ Misira, e fama donse haramuxie donde Asiriya bɔxi ma.

⁴E mu sɛrɛxɛ ye daaxie bama Alatala bɛ. E xa sɛrɛxɛe mu rafanma a ma, e luma alɔ ɲɔn yire taami. Naxee nee donma e findima sɛniyɛntaree nan na. Na findima donse nan na e bɛ, kɔnɔ a mu findima sɛrɛxɛ ra Alatala bɛ a xa hɔrɔmɔbanxi kui.

⁵Wo munse rabama sali lɔxɔɛ Alatala ya i?

⁶Hali e sa e ratanga gbaloe ma, Misirakae fama nɛ e faxade, e e ragata Nofi. E xa harige birin lɔɛma nɛ, e xɔnyi findima nɛ wula ra.

⁷Ɲaxankatɛ lɔxɔɛe na fafe, yunubi sare ragbilenma tɛmui naxɛ. Isirayila xa na kolon. Isirayila xa yunubi gbo, na na a ra e namiɲɔnmɛe xɔnma, e daxui xili sa e xun ma.

⁸Ala nun namiɲɔnmɛe Efirami kantama, kɔnɔ mixie tan gantanyi tema namiɲɔnmɛe bɛ. E mu rafan mixie ma Ala xa hɔrɔmɔbanxi kui.

⁹Efiramikae bara so yanfanteya kui, alɔ naxan nabaxi Gibiya. Ala mu nɛɛmuxi e xa yunubi ma, a fama e ɲaxankatade na nan ma.

¹⁰«N to Isirayila to, a nu fan alɔ bogi se naxan toma wula i. Wo benbae nu luxi nɛ alɔ xɔrɛ bogi singee, kɔnɔ e naxa bira kuye xɔnxi fɔxɔ ra naxan nu na Peyori.

¹¹Efirami xa binyɛ sigama nɛ alɔ xɔni naxan tuganma. Di bari mu na, tɛɛgɛ mu na.

¹²Xa a sa a li e naxa die xuru, n e birin bama nɛ e yi. E fe ɲaaxi sɔtɔma nɛ n na e rabolo tɛmui naxɛ.

¹³N bara Efirami to a sabatixi yire fanyi, alɔ Tire na ki naxɛ, kɔnɔ Efirami xa die soma nɛ faxɛtie yi ra.»

¹⁴Alatala, a lanma i xa munse raba e bɛ? I xa ginɛ furuxie furi kana, i xa e xiɲɛ xara.

¹⁵E ɲaaxui birin masenxi nɛ Giligali. Mɛnni n bara e xɔn fɔlɔ e xa fe ɲaaxie xa fe ra. E mu rafanma n ma sɔnɔn. E xa kuntigie findixi matandilae nan na.

¹⁶«N bara Efirami bɔnbɔ. A luxi nɛ alɔ sansi naxan sanke bara xara, a mu bogima sɔnɔn. Xa Efiramikae fa die bari, n e halakima nɛ.»

¹⁷N Marigi Ala fama nɛ e rabɛɲinde, barima e mu e tuli matixi a ra. E findima nɛ biyaasilae ra sie tagi.